Три љубовни романи совршени за оваа зима

Овие три љубовни романи се читаат без здив од првата до последната страница. А, вие ќе се вљубите во главните хероини и во нивната сила, но и желбата да направат сè во име на љубовта...

Сместени во различни временски периоди, „Чудесната госпоѓица“, „Пустинска роза“ и „Париската сопруга“ имаат нешто заедничко – трите главни женски ликови пленат со својот шарм, досетливост, сила, но и посветеноста на љубениот маж.

Токму затоа во студените зимски денови разгорете ја и сопствената страст со некоја од нив.

Кои се книгите кои треба да ги прочитате оваа зима?

„Чудесната госпоѓица“ – Лорета Чејс

Алистер Карсингтон сака да им избега на своите најлоши навики, постојаното флертување и страста кон жените.

Тој среде зима заминува во Дарбишир и се надева дека ќе побегне од своите пороци, но и дека ќе помине малку време со пријателот што му го спаси животот во битката кај Ватерло.

Но, Алистер таму ја запознава Мирабел Олдриџ, своеглава девојка која е досетлива, но и совршено неодолива.

Ни Мирабел не сака да се вплетка во љубовната мрежа на привлечниот благородник, но тоа не ѝ оди воопшто лесно.

„Пустинска роза“ – Џулија Дросен

Сибила е самохрана мајка со 3 деца и живее во Мароко, туѓа држава која е истовремено и убава, но и опасна.

Низ годините таа станува вистински бизнис магнат и ги урива предрасудите дека жените не можат да имаат кариера.

Сибила не се плаши од никого што ќе ѝ застане на патот.

Таа е веќе 20 години во Мароко, но не сака да се врати во родната Англија.

Сибила сфаќа дека за ориенталниот свет ја поврзува нешто многу подлабоко од работата – љубовта без која не може да живее.

Но, љубовта и работата скоро никогаш не одат заедно, а тоа го чувствува и Сибила на своја кожа.

„Париската сопруга“ – Пола Меклејн

Приказната за еден од најпочитуваните светски писатели, Ернест Хемигвеј, почнува во 1920 година во Чикаго.

28-годишната Хејли мисли дека нема среќа во животот, но тогаш го запознава Хемингвеј - талентиран и амбициозен писател, со кого се мажи.

По венчавката тие се селат во Париз.

Таму, Хемингвеј прави сè за да си обезбеди место во историјата на литературата и потпаѓа под бројни искушенија во градот на пороците и развратот.

Тој е опкружен со убави жени, а Хејли чувствува дека го губи, па прави сѐ за повторно да ја разгори љубовта меѓу нив.

А. Ј. | Црнобело