3 книги што ќе ви донесат духовно богатство (и мирен ум)

Читате ли книги за самопомош и просветлување? Сакате ли да ги следите светските трендови во нефиктивните изданија и книгите за кои се зборува низ целиот свет? Тогаш овие три се само за вас...

Велат дека книгите се богатство, а овие три книги се едни од најпопуарните (во светски рамки) кога станува збор за четива кои ни носат духовни знаења и ни помагаат да го смириме умот, кој е растргнат од потребата за егзистенцијална сигурност, материјално богатство и љубов од соништата.

Кои три книги треба да ги прочитате за целосно да си ја промените перспективата на светот?

„8 правила на љубовта“ – Џеј Шети

Никој нема да седне до вас и да ве научи како треба да сакате и како треба да изгледа љубовта. Најчесто сите сме жртви на идеализираниот концепт за љубовта прикажан во романтичните филмови и романи и се водиме од правилата што ни ги прикажува поп-културата за да бидеме среќни.

Но, Џеј Шети во својата книга се обидува да ви сподели конкретни чекори што може да ви помогнат како да ја негувате љубовта во животот.

Тој ве учи како да поминете низ тешките периоди во животот, како да ја дефинирате љубовта и да не дозволите разделбите да ве скршат.

Ги разработува сите фази од љубовните врски и ве учи како да избегнете да заталкате по патеките на лажните убедувања и да се вљубите во партнери што не ве заслужуваат.

„101 лекција што ќе ви го сменат начинот на размислување“ – Бријана Вист

Мислите дека вашето минато ве дефинира како личност, и уште полошо, сметате дека таа реалност е непроменлива, а вистината е дека вашата перцепција за минатото се менува заедно со вас...

Во оваа книга Бријана ве учи зошто целта е поважна од страста, зошто негативните мисли некогаш се добри за нас, и зошто секојдневието има своја важност во нашите животи.

Станува збор за книга што ќе ви помогне да се ослободите од заблудите, ќе ве натера да се спознаете себеси и да бидете отворени за нови позитивни промени.

По оваа книга ќе имате чувство како да сте биле на терапија, ќе ви даде можност да созреете и длабоко да навлезете во себеси.

„Богатство што не се купува со пари“ – Робин Шарма

Книга која го редефинира поимот „успех“ и ве учи како да живеете исполнет живот следејќи ги осумте форми на богатство: раст, добросостојба, семејство, умешност, пари, заедница, авантура и услуга.

Книга која ќе ве научи дека вистинското богатство не е во вашата трансакциска сметка, луксузните автомобили и одмори.

Ќе сфатите дека луѓето што имаат просперитет всушност се многу сиромашни кога станува збор за она што е навистина важно во животот.

Книгата е полна со практични алатки и тактики што може целосно да ви го трансформираат животот и погледот на свет.

Б. С. Б. | Црнобело