Книги од македонски автори кои мора да ги прочитате до крајот на 2025

Потрага по сериски убиец во Италија; млад брачен пар кој се соочува со морничави ситуации на медениот месец; приказна за жена која се враќа во родното место и се соочува со себе и своите „демони“ - македонските автори стануваат вистински мајстори на трилерот, а овие книги мора да ги прочитате.

Во време кога деновите стануваат постудени и пократки, нема ништо поубаво од топол дом и убава книга.

Овој пат ви препорачуваме три книги од македонски автори кои ќе сакате да ги прочитате што побрзо, зашто приказните се одлични, а ликовите комплексни, но ќе ги засакате веднаш.

Кои три книги од домашни автори можете да ги прочитате во следниов период?

„Сиракот од Бергамо“, Петар Стојановски

Десетина години откако е затворен најголемиот полициски случај во историјата на Италија, злото повторно чука на врата.

Две години Калин е сокриен под таен идентитет во Лугано со своето семејство. Тој е 40-годишен оперативец во тајната полиција на Италија, кој повторно е активиран откако е пронајдено безживотното тело на неговиот поранешен шеф во пензија, Флорини.

Покрај телото на обесениот маж е оставена порака, а името на Калин се наоѓа на неа.

Тој сега мора да балансира помеѓу семејството и темните опасности кои демнат од минатото, особено што желбата за одмазда на убиецот е посилна од сè.

Калин, заедно со агентот Џенаро, почнува комплексна истрага и пробува да го открие серискиот убиец кој брутално убива невини жртви во Бергамо.

Тој не само што остава иста порака по секое грозоморно дело туку изгледа како секогаш да е еден чекор пред нив.

„Одмаздата на богомилката“, Оља Петрушевска - Томева

Сара е силна, но длабоко повредена жена, чие детство е обележано со загуба, насилство и молк.

Нејзината глад за правда и одмазда ја турка низ светот, од темните тајни на родниот град до блескавите фасади на меѓународниот бизнис.

Кога се враќа дома, минатото ја пречекува со отворени раце - старата болка, заборавените пријателства, нераскажани вистини.

Повторната средба на Сара со самата себе, средбата со сестра ѝ Ева, нерешените убиства, мистериозниот инспектор и незаменливиот пријател Филип, единствениот маж нејзиниот живот се дел од мозаикот што полека се составува.

Или можеби само така ѝ изгледа.

Овој психолошки роман со елементи на трилер и длабоки емотивни слоеви ќе ве натера да се прашате колку навистина познавате некого - па дури и самите себе.

„Пеколен меден месец“, Благоја Стојков

Бен, млад, луд маж, со апетит за авантура, сосема случајно и неочекувано ја запознава Кејти - нежна, емотивна девојка, склона кон романтизирање на животот.

Љубовта го наоѓа својот пат и ги спојува, а Бен и Кејти се заљубуваат вистински, исконски, неприкосновено. И набрзо стапуваат во брак.

Решаваат да одат на меден месец во Монтана.

Монтана е прекрасна. Воодушевувачки пејзажи, божествена природа, фини луѓе. Уникатни флора и фауна. Рај за очи, спокој за душа.

Но, се појавува чувство на несигурност. Нешто необјасниво. Нешто што и Бен и Кејти го чувствуваат, а не можат да си го објаснат.

Мистериозна шума. Приказни за лудак кој избегал од лудница. Злокобен ресорт, фарма, имот…? Нешто непознато и одделено од тамошната цивилизација.

Бен и Кејти во Монтана се среќаваат со најстрашното нешто на кое некогаш се осудило човештвото.

А. Ј. | Црнобело