Книги кои би сакале да ги пронајдете под новогодишната елка

„Книгата е подарок што може да го отворите повторно и повторно“. Подарок кој не ја губи својата вредност, кој не здосадува, подарок кој може да премине од едни во други раце и повторно да се врати кај вас.

Во пресрет на новогодишните и божиќните празници за вистинските љубители на добрите книги, овие 3 предлози со сигурност ќе сакате да ги подарите некому или пак да ги пронајдете спакувани под вашата новогодишна елка.

Пријатно празнично читање:

Нешто во водата - Кетрин Стедман

Марк и Ерин се очигледно совршениот пар. Нивната љубов е силна и тие се магнетски привлечени еден кон друг. Ерин е режисерка на документарни филмови, а Марк успешен банкар.

Двајцата живеат во Лондон и се подготвуваат за медениот месец во Бора Бора. Но, Марк одненадеж ја губи работата, а нивната среќа започнува да се урива како кула од карти.

Сепак, двајцата се фаќаат како давеници за сламката спас – медениот месец кој ќе ги реши сите проблеми.

На Бора Бора, Марк инсистира да отидат на нуркање, иако Ерин се плаши од водата, но тој ја убедува дека покрај него ќе биде безбедна. Неочекувано, наоѓаат нешто во водата…

Таен сведок - Џон Гришам

Мајсторот на трилерите, Гришам, овој пат ги освојува читателите со нов, возбудлив роман за корумпираноста на судството.

Лејси со години работи во Комисијата за судска етика, кога на нејзиното биро пристигнува нов предмет. Поранешен адвокат тврди дека една истакната судијка е една од најкорумпираните во историјата на американското правосудство.

Според него, таа ги има вмешано прстите во изградбата на огромно профитабилно казино во индијански резерват каде што важат други закони, но тоа секако не е сè.

Грег Маерс тврди дека судијката со години соработува директно со мафијата и дека има таен сведок кој може да го потврди сето ова. Дали Лејси ќе го стави својот живот во опасност впуштајќи се во истражувањето на новиот случај?

Бусола - Матијас Енар

Извонредно моќен роман за кој се вели дека Агата Кристи и Балзак се здружиле на еден сосема неочекувана книжевна авантура.

Музикологот Франц Ритер има инсомнија една ноќ во Виена. Тој започнува да ги оживува спомените од минатото и некаде помеѓу сонот и сеќавањата ја анализира својата опиеност од Блискиот Исток, патувањата во Истанбул, Алепо и Техеран…

… и неизбежните мигови кои ги има поминато со жената во која е вљубен, Сара. Овој прекрасно исткаен роман полн со горчливо-сладок хумор е мост помеѓу денешниот и утрешниот миг и источната и западната култура.

(О)Милена | Црнобело