Срцето и душата полни – книги со празнична магија за среќен крај на една лоша година

Ја имавме можеби најлошата година во нашите животи. Но, како и за секое добро, бевме сите заедно да го споделиме заедно и лошото.

Заокружете го последниот месец од годината со топли книги полни со празнична магија. Навистина ќе ви ги стоплат срцето и душата... и барем малку ќе ја ублажат болката од лошата година која се надеваме дека никогаш нема да се повтори:

Нека снежи: Три празнични романси - Џон Грин, Морин Џонсон и Лорин Миракл  

Божиќ е и Грејстаун е затрупан со снег. Но, времето е повеќе отколку само мала незгода. Кога една девојка неочекувано ќе слезе од еден завеан воз, таа предизвикува цела низа настани што засекогаш ќе променат неколку животи.

Наскоро – четиринаесет загреани мажоретки ќе го преплават локалниот „Вафл Хаус“, филмската вечер на Дјук ќе биде грубо прекината заради една Твистер-мисија, а една вљубена шанкерка ќе одлучи за судбината на едно прасенце...

На крстопатот на трите приказни, првпат ќе се сретнат неколку туѓинци. И во центарот на снежниот Грејстаун – ќе расцути романсата! Исто како и во вашето топло, празнично срце.

Малите жени – Луиза Меј Алкот

„Малите жени“ е приказна за четири сестри: Мег, Џо, Бет и Ејми Марч. Базирана е на личните искуства на авторката и нејзините три сестри. Секое од девојчињата се бори со некоја особена, лична карактеристика: Мег е суетна, Џо е избувлива, Бет е срамежлива, а Ејми е егоцентрична.

Додека девојчињата се обидуваат да ги надминат тешкотиите во животот најдобро што умеат додека татко им е далеку, во војна, низ нивната креативност и меѓусебна љубов тие успеваат да уживаат во убавите мигови и да опстојат низ тешките времиња.

Сам дома – Џон Хјуџес

Класичниот филм што сите го знаете и го сакате сега е илустрирана сликовница во која може да ужива целото семејство - исполнета со смотаните крадци, брилијантните стапици и со малиот Кевин, кој мора да го брани својот дом.

Дали може да ги спречи крадците да влезат во неговиот дом? И дали неговото семејство ќе се врати навреме за Божиќ?

Божиќна мистерија - Јустејн Гордер

Едно момче наоѓа избледено, рачно изработено божиќно календарче во една книжарница. Од него паѓа превиткан лист на кој е напишан првиот дел од необичната приказна за малото девојче што патува назад во времето до Витлеем и раѓањето на Христос.

Во меѓувреме, испреплетената приказна за сегашноста излегува на виделина, и момчето дознава за чудниот човек што го направил календарчето и за девојчето што исчезнало на Бадник пред четириесет години...

фото: snow png from pngtree.com

Сè што син ми треба да знае за светот - Фредрик Бакман

Бакман ни дава интимен увид во односот меѓу татковците и синовите. Проникнувајќи длабоко во сопственото искуство и обраќајќи се директно на своето дете, Бакман ги разгледува перспективата и алатките што ќе му бидат потребни на неговиот син за да се снајде во светот.

Делумно мемоари, а делумно љубовни писма, оваа книга претставува прирачник за големите, но и малите животни лекции, подеднакво важни како и првите.

Од тоа како да се излезе накрај со љубовта до тоа како да се монтира парче мебел од ИКЕА. И нешто уште поважно – зошто таткото понекогаш ќе му ја стега дланката малку поцврсто од обично.

(О)Милена | Црнобело