Три нови наслови кои вреди да ги понесете на плажа со себе

Летните одмори сè уште се во тек, а тоа значи физичка но и ментална релаксација на телото и умот.

Многу нови изданија од различни издавачки куќи, а овојпат издвоивме три наслови кои целосно ќе го окупираат вашето внимание за време на летниот одмор:

Детето – Себастијан Фицек

„Се викам Симон. Имам 10 години. Јас сум сериски убиец.“

Роберт Штерн, успешен адвокат, не е ни свесен што го чека кога прифаќа да се сретне со нов клиент во предградието на Берлин.

Затоа се шокира кога сфаќа дека личноста којашто треба да ја брани е десетгодишно момче – Симон – кревко дете со хронична болест, кое тврди дека бил убиец во претходниот живот.

Изненаденоста на Штерн брзо се претвора во хорор кога го пребарува подрумот каде што го испраќа Симон и наоѓа остатоци од човечки скелет, череп расечен со секира – баш како што Симон му кажува дека ќе најде.

Катерина од Сиена – Сигрид Унсет

Извонредно активна, интелигентна и храбра жена, Катерина на рана возраст се посветува на љубовта божја.

Интензитетот на нејзината молитва, жртви и служење на сиромашните ѝ донел репутација на светост и мудрост и била повикана да склучи мир меѓу завојуваните благородници.

Со чувствителност на ревносната љубов кон Бога и како човек што проникнал во животот на света Катерина, Унсет претставува најтрогателен и незаборавен портрет на една од најголемите жени на сите времиња.

Брада натопена со крв – Даниел Галера

Главниот лик се обидува да ги открие деталите за смртта на дедо си. Почнува со посета на татко му кој му ја најавува намерата да се самоубие и му ја раскажува приказната за мистериозната смрт на дедо му.

Го убиле во Гаропаба, мал приморски град на југот на Бразил, во текот на неделна игранка, кон крајот на 1960-тите, при што никогаш не биле најдени ни телото ни виновниците.

Скршен по загубата на татко си, семејните несогласувања и љубовното предавство, младиот човек, инаку професор по физичко образование, се сели во Гаропаба во потрага по личен мир и по вистината за дедо му.

(О)Милена | Црнобело