Младиот македонски автор Јован Илиески со нов роман – „Татко ми, Босфор“

„Конечно! Со неизмерна возбуда ви го најавувам мојот нов роман со наслов 'Татко ми, Босфор'. Долго го чекав моментов и сигурен сум дека ова е најдоброто од мене досега“, вели младиот автор Јован Илиески за неговиот нов роман.

Младиот македонски автор Јован Илиески го најавува неговиот нов роман, насловен „Татко ми, Босфор“ кој уште не е во продажба, но наскоро ќе има промоција во Тетово и Скопје.

„Конечно! Срцето ќе ми излезе од радост!

Со неизмерна возбуда ви го најавувам мојот нов роман со наслов 'Татко ми, Босфор'. Долго го чекав моментов и сигурен сум дека ова е најдоброто од мене досега. Пресреќен сум што мојот нов роман е во рацете на Антолог.

Се надевам дека го оправдав вашето чекање и новиот роман 'Татко ми, Босфор' ќе го прочитате со исто срце како што и јас го напишав.

Романот сè уште не е во продажба, а промоција на истиот ќе има и во Тетово, и во Скопје. Наскоро ќе објавам и детали околу продажбата, како и заслужената крштевка на ова мое најмало дете.

Ве сакам и едвај чекам да ве известам кога ќе може да го имате во свои раце!“, вели Јован

Во продолжение, сижето на романот:

На самиот крај од XIX век и почетокот на XXI век, некаде помеѓу современиот свет и почетокот на падот на Османлиската држава, се случуваат две, навидум различни приказни.

Камила Џалал е посветена детективка која ќе го преврти Истанбул за да ја најде причината за смртта на нејзиниот сопруг.

Но, Камила Џалал е и девојка која по низа несреќни случаи во нејзиниот живот почнува да станува блиска со луѓето околу султанот во сарајот Јилдиз.

Додека се приближува крајот на династијата и соборувањето на султанот Абдулхамид од престолот, на другата страна од времето, Босфор трага да го најде чудовиштето зад серија убиства коишто ја згаснаа светлината на градот.

Што имаат заедничко девојките со исто име?

И двете живеат за едно нешто. Да ѝ најдат смисла на смртта.

Спирова С. | Црнобело