„Каде бегаш“ на String Forces наполни 20 години – „Изохронија“ останува еден од култните македонски албуми кои ја редефинираа музиката

Песната „Каде бегаш“ на String Forces беше промовирана со видео-запис на 25.04.2001 година. 20 години потоа, таа останува една од најомилените современи, македонски песни.

String Forces е формирана во 1995 година во Скопје, околу „жиченото“ јадро: Алфрида Тозиева – виола, Доријан Јовановиќ – бас гитара, Сашо Трендафилов – гитара.

До крајот на 1996 имало неколку промени на пејачи, а конечниот резултат се Јелена Брајовиќ и Елена Мановска. Со доаѓањето на тапанарот Влатко Икономов се оформил составот којшто го снимил првиот, самонасловен албум во 1998 год.

Албумот бил издаден на почетокот на 1999 и бил одлично прифатен од критичарите, но не и од пошироката јавност и слушателите. Ова довело до мало губење на насоката што резултирало со поголема промена на членовите кон средината на 2000 година.

Тогаш се оформил и последниот актуелен составот на групата: Александра Мангаровска-Милиќевиќ – вокал и флејта, Александар Стојанов – вокал и гитара, Алфрида Тозиева – виола, Дориан Јовановиќ – бас гитара, стик, ут, и електроника, Благојче Пенов – тапани. Оваа промена се совпаднала и со промената на стилот и музичката насока на групата.

Групата го промовирала видео-спот за песната „Каде бегаш“ во април, 2001 година, а песната доживеа огромен успех, искачувајќи се на првото место на топ-листите на Македонската радио-телевизија. 

Таа е дел од вториот студиски албум „Изохронија“, чија промоција се одржа на почетокот на 2002 година.

Во „Изохронија“ се вбројуваат уште неколку големи хитови:

Води Ме: 1 Дел

Суб

Келари Шарени

Дали ви недостига музиката на String Forces? Минатата година, групата на својот официјален профил на Фејсбук го напиша следното:

„Дали сме ви кажале дека од почетокот на мај 2020 до сега String Forces издадоа (дигитално) 3 албума снимени во живо?! Е па ако сме ви кажале, тогаш не сме биле во право затоа што се 4 (со зборови: четири) албума во живо. И што е уште поинтересно, има уште за издавање. Можеби ви е вас тоа досадно и не баш потполно јасно зошто, но ете во случајов ни се може, а и добра прилика е ова време-невреме да се искористи за да се научат некои работи, пред сè! Снимено во живо во клубовите Вега (во 2005) и Хавана (во 2009). Да, постоеа и клубови едно време во коишто се свиреше…“.

Се надеваме дека наскоро ќе ги слушнеме String Forces во живо.

(О)Милена | Црнобело / Фото: Фејсбук