Што ќе се случи на Земјата ако Месечината одеднаш исчезне?

Ако Месечината исчезне, деновите постепено ќе стануваат пократки бидејќи нејзината гравитација има влијание врз ротацијата на Земјата. Нашиот природен сателит има огромно влијание и врз начинот на којшто се развивал животот на Земјата.

Нашата планета има еден природен сателит кој иако мал, има огромно влијание врз Земјата.

Покрај плимата и осеката, месечевата гравитација, па и нејзиното само формирање, дефинитивно имале голем удел во тоа како се развивал животот на Земјата.

Што би се променило ако Месечината исчезне?

Можно е да се променат годишните времиња

Земјината оска е под агол во однос на нејзината орбита околу Сонцето. Овој агол изнесува околу 23 степени и токму тој е причина за годишните времиња.

Односно, кога северната хемисфера е наклонета кон Сонцето, таму лето, а на друга хемисфера е зима, и обратно.

Научниците сметаат дека наклонот на земјината оска настанал пред околу четири милијарди години, кога нашата планета била удрена од големо небесно тело.

Се претпоставува дека од овој судир настанала и Месечината која, пак, со својата гравитација, делува врз Земјата, односно на некој начин ја стабилизира оската.

Ако Месечината одеднаш ја снема, ќе се изгуби и влијанието на нејзината гравитациска сила, па можно е да има промени во наклонот на оската.

Со текот на времето, наклонот би се променил многу, со што би се забележала и значителна промена на годишните времиња.

Плимата драстично ќе се намали

Плимата и осеката се водени од неколку фактори. Покрај земјината ротација и гравитацијата на Сонцето, тие се под влијание и на месечевата гравитација.

Всушност, Месечината е главниот „виновник“ за појавата на плима и осека бидејќи е блиску до Земјата – колку е поблиску, толку е повисока плимата.

Доколку Месечината исчезне, ќе остане само плимата под влијание од Сонцето, која е многу пониска.

Деновите ќе бидат пократки

Месечевата гравитација има влијание и врз ротацијата на Земјата, односно ја забавува.

Доколку Месечината исчезне, ќе се забрза ротацијата на Земјата, а со тоа деновите ќе станат пократки.

Во минатото, кога Земјата немала свој природен сателит, деновите траеле само по шест часа, па доколку Месечината не се формирала, животот на планетата би бил многу поразличен.

Сите живи суштества на планетата се адаптирани на 24-часовно деноноќие, што значи многу организми тешко би преживеале на планета каде овој циклус е многу пократок.

Ноќите ќе бидат потемни

Од светлосното загадување од градовите, денес ретко забележуваме колку силна светлина емитува Месечината навечер.

Можеби нам не би ни пречело, но бројни животни се ориентираат според месечевата светлина, па многу видови би се соочиле со голем предизвик ако Месечината одеднаш ја снема.

Спирова С. | Црнобело