Дијаманти, вода или лава: Како изгледаат океаните во вселената?

Верувале или не, постојат океани кои се наоѓаат надвор од нашата атмосфера, па дури и нашиот соларен систем. Некои од нив се од вода, а некои пак, од вжештена лава.

Еве неколку од нив:

Дијамантските океани на Нептун и Уран

На надворешните рабови на сончевиот систем се наоѓаат двете ледени планети, Нептун и Уран. Под нивната атмосфера имаат слична површина изградена од: вода, амонијак и метан.

Научниците открија под колкав притисок и температура се топи дијамантот, па така се потврди и можноста за дијамантски океани токму на овие две планети. Нептун и Уран имаат идеална температура и притисок за топење на дијамантот.

Океан од магма

„Ио“ е највнатрешната месечина на планетата Јупитер, а исто така и месечина со најголем број на вулкани во нашиот сончев систем. Со над 400 вулкани, неговата површина постојано се соочува со експлозии и лава.

Подземен нуклеарен океан на Плутон

Во 2015-та година, сондата „Нови Хоризонти“ ќе ја заврши 3000-дневната мисија на самиот раб на нашиот соларен систем, а ќе влезе во орбитата на планета Плутон.

Преку слики со ниска резолуција и податоци од орбитите, научниците можат само да шпекулираат што лежи на површината на Плутон. Како и многу други планети во нашиот Сончев систем, под површината на Плутон лежат радиоактивни елементи посебно: ураниум, калиум-40 и ториум.

Кога овие елементи се подложни на радиоактивен распад испуштаат доволно топлина за водата да се задржи во течна состојба. Додека на површината на Плутон температурата може да биде значително под нулата, можно е да постои подземен нуклеарен океан.

Подземен океан на Енцелад

Во јужниот поларен регион на Сатурновата шеста по големина месечина, се наоѓа голем океан под ледената површина кој би можел да содржи живи организми.

За време на мисиите на прелетување во 2012-та година, научниците беа во можност да утврдат дека постои океан од течна вода под површината.

Овој океан, не само што е создаден од вода во течна состојба, туку исто така содржи органски соединенија (натриумови соли), што значи дека има основни состојки за живот.

Планета на океанска лава

Алфа Кентаури е најблиската ѕвезда до нашето Сонце и е 4,2 светлосни години оддалечена од нас. Слична по големина со Сонцето. Оваа далечна ѕвезда има барем една планета што орбитира околу неа.

Со користење на различни техники и употреба на Доплеровиот ефект, откриена е планета со големина на нашата планета која орбитира околу Алфа Кентаури Б, а е наречена Алфа Кентаури ББ.

Алфа Кентаури ББ не е погодна за живот. Нејзината температура на површината е околу 1.200° целзиусови. Високите температури доведуваат до целосно топење на карпите со што се создава океан од лава.

Автор: М.A. | Црнобело