Огнено торнадо во Австралија, мачка со простетички нозе - Најдобрите научни фотографии направени во 2020-та

Во 2020-та година археолозите најдоа неколку лебарки заробени во смола кои се стари околу 99 милиони години. Засега ова е најстариот примерок од лебарки што го имаме најдено.

Можеби препознавате дека на фотографијата се гледа големата црвена дамка на Јупитер. Оваа дамка е всушност бура која трае со векови, а неодамна научниците сфатија дека се намалува. Пред неколку векови дамката била трипати поголема од Земјата, но денес е колку нашата планета.

На 19-ти март 2020, на пролетната рамноденица, Сонцето во Египет зајде веднаш зад познатата сфинга, а резултатот е оваа неверојатна фотографија. Според археолозите, ова е доказ дека древните Египќани внимателно ја одбрале положбата на сфингата во согласност со двете рамноденици во годината.

Ова маче беше најдено во 2018-та година, закопано под сибирскиот снег. Бидејќи било премрзнато, ветеринарите морале да му ги ампутираат сите нозе, ушите и опашката, но во 2019-та тоа си доби протези. Минатата година, пак, научниците кои му ги направија протезите споделија и фотки.

Ова е фотографија направена за време на пожарите кои ја зафатија Австралија и на неа се гледа огнено торнадо кое е последица од нив.

На оваа фотографија се гледа „најдолгото животно на светот“. Ова подводно суштество е од видот сифонофор и на некој начин е колонија од помали организми кои си имаат своја функција, но сепак се однесуваат како еден организам. Обично овие колонии стигнуваат должина до 30-тина метри, но овој примерок е долг неверојатни 45 метри.

Во 2020-та научниците направија и фотографија од формирање на планета. Овде се гледа раѓањето на нова планета околу ѕвездата AB Aurigae, лоцирана на 520 светлосни години од Земјата. Според научниците, планетата се формира во центарот и овој процес ќе трае многу, многу години.

Уште една фотографија од корона вирусот. Според истражување од јули, клетките инфицирани со вирусот пуштаат еден вид пипала кои му помагаат на вирусот да ги зарази и другите клетки. Овие пипала, кои научниците успеаја и да ги фотографираат, прават дупки во околните клетки и му помагаат на вирусот полесно да ги зарази.

Спирова С. | Црнобело / Фото: Live Science