Го погреба синот, ја победи депресијата: Животната приказна на Ени Ленокс

Детали

понеделник, 08 јануари 2024

Популарната пејачка Ени Ленокс (69), иако секогаш насмеана на сцената, преживеа многу љубовни болки и премрежија во животот. Таа успеа да ја победи депресијата, љубовните разочарувања и смртта на детето, а среќата ја пронајде на 58 години, кога се омажи третпат.

Ени Ленокс повеќе од 4 децении е дел од светската музичка елита. Продала преку 80 милиони албуми, добила многу награди и признанија, меѓу кои и Греми и Оскар за најдобра песна за филмот The Lord Of the Rings: The Return of the King, a музичката станица VH1 ја прогласи за најдобрата бела соул пејачка на сите времиња.

Но, Ленокс, која беше дел од дуото Eurythmics, последниве 15 години многу повеќе време и енергија посветува на хуманитарната работа, отколку на музиката.

Таа им помага на африканските жени и деца заразени со ХИВ, а поради својата работа УНЕСКО во 2010 ја прогласи за амбасадор на добра волја во борба против сидата.

За својата хуманитарна работа доби одличје и од кралицата Елизабета Втора.

Нејзината емпатија кон сиромашните и болните потекнува уште од детството, бидејќи растела во беда.

Татко ѝ работел на бродоградилиште во Шкотска, а мајка ѝ Дороти била готвачка во работничката кантина.

Иако родителите биле сиромашни и необразовани, се труделе да ѝ овозможат на својата ќерка сè што можат.

Бидејќи од дете покажувала музички талент, на 7 години почнале да ѝ плаќаат часови по клавир, а потоа и да ја запишат во добро училиште, иако многу соседи им се потсмевале поради тоа.

Ги слушала Битлси и ги пеела сите нивни песни, а кога на 11 години на телевизија видела настап на жена која свири на флејта, веднаш се заљубила во инструментот.

На крајот родителите попуштиле и ѝ купиле флејта.

На првиот час, поради погрешна техника за дишење, Ени хипервентилирала и повратила пред професорката.

Но, ни оваа траума не ја спречила да научи да свири флејта.

Како дете била повлечена и не се дружела со врсниците. На училиште имала добри оценки, но вели дека школото ѝ било здодевно и напорно.

„Во младоста се борев со депресија и меланхолија. Секогаш бев осамена, како да не припаѓам никаде.

Сега веќе не е така, а кога сум тажна им се јавувам на пријателите“, призна таа пред неколку години.

Првиот настап го имала на 16 години, на натпревар за таленти во мало место во Шкотска.

Пред стотина луѓе ја испеала шкотската народна песна Mairi’s Wedding и победила.

Следната година се запишала на студии по флејта и клавир на Кралската музичка академија во Лондон, но не била сигурна дека направила вистински избор.

Се плашела од идејата дека може да заврши како учителка во некое школо, па поради мрачните мисли за иднината, често не одела на предавања.

Бидејќи сама го плаќала студирањето, работела како продавачка, келнерка, помошничка во фризерски салон...

Продолжува на следната страница...