5 години е сингл, а се појави на настан со огромен дијамантски прстен – Дали Џенифер Анистон се свршила во тајност?

Детали

понеделник, 26 февруари 2024

„Никогаш не велам никогаш, но засега не сум заинтересирана за брак“ – изјави пред 2 години Џенифер Анистон, која сега беше забележана со огромен дијамантски прстен. Таа ги подгреа гласините дека се свршила во тајност, а фановите се прашуваат кој успеал да ѝ го украде срцето.

Актерката Џенифер Анистон во саботата (24.02) се појави на доделувањето на SAG наградите. На црвениот тепих таа зачекори во сребрен фустан со голем шлиц и длабоко деколте, но речиси сите очи беа вперени во огромниот дијамантски прстен на нејзината рака.

Заради прстенот, многумина веруваат дека актерката одлучила по третпат да ѝ даде шанса на љубовта и дека е веројатно да се свршила во тајност, иако засега никој не знае дали таа воопшто се гледа со некого.

Во последните пет години, Џенифер не била забележана со никого, а во едно интервју пред две години изјави дека не размислува за брак.

„Никогаш не велам никогаш, но засега не сум заинтересирана за брак“ – изјави актерката и призна дека би сакала да има врска со некого кој би ѝ бил партнер и би ѝ помогнал во тешките периоди во животот.

„Би сакала да бидам во врска... Којзнае? Има мигови кога сакам само да се стуткам и да речам: ‘Ми треба поддршка’.

Би било прекрасно да си дојдеш дома и да се фрлиш во нечија прегратка, па да речеш: ‘Ова беше навистина тежок ден’“ – изјави актерката во 2022-ра година.

Таа тогаш додаде дека не би сакала да започне врска сѐ додека не успее да се посвети на себе и да се справи со сопствените трауми.

Актерката во една пригода рече дека тешкиот развод меѓу нејзините родители, кога таа имала само 9 години, оставил траги врз неа и дека заради нив таа не била полна со ентузијазам за да стапи во брак.

Таа рече дека ѝ било многу полесно да биде сама затоа што не сакала да се жртвува себеси или сопствените потреби и дека не знаела како да го направи тоа.

„Затоа ми беше многу полесно да бидам сама. Немав кој да ме научи како да давам и да возвраќам во врските“ – изјави актерката.

За потсетување, Џенифер беше во брак со Бред Пит од 2000-та до 2005-та година, а во 2012-та се сврши со нејзиниот втор сопруг Џастин Теру, со кого се разведе во 2018-та година.

Б. С. Б. | Црнобело