Израснал како сирак, дисквалификуван е од Евровизија заради напад врз жена – Факти за Јост Клајн од Холандија

Кој е Јост Клајн и што знаеме за него?

Јост Клајн е роден во 1997-ма година во Леуварден во Холандија.

Како момче со долга руса коса, често му се случувало да го мешаат со девојче, заради што бил жртва на булинг и на насилство во училиште.

Неговата песна Europapa со која настапи на втората полуфинална вечер на Евровизија 2024, е посветена на неговите родители кои ги загубил кога бил многу млад.

Кога Јост имал само 12 години, татко му починал од рак, а една година подоцна мајка му починала од срцев застој. Настапот на Евровизија им беше посветен ним, а песната беше емотивно писмо до татко му.

Во една пригода тој изјави дека на татко му пред смртта му ветил дека ќе стане писател.

Според раскажувањата на нивните соседи, татко му на Јост често знаел да им помага на имигрантите (од Авганистан и другите земји) кои дошле во Холандија во потрага по подобар живот.

Токму од него ја научил првата лекција за љубов кон човештвото и за почит кон сите вери и нации – за што пееше и во својата песна.

По смртта на родителите останал сирак, а за него се грижеле неговите постари брат и сестра, кои биле доста повозрасни од него. Откако станал славен брат му во еден период дури и му бил менаџер.

На рацете тој ги има истетовирано годините на раѓање на неговите брат и сестра во знак на почит за грижата кон него и љубовта што му ја пружале кога неговите родители повеќе не биле тука. Затоа тој на рацете ги има броевите 1983 и 1982.

Инаку, уште додека биле неговите родители живи, Јост снимал видеа на YouTube, а потоа целосно се посветил на оваа кариера и тоа му помогнало на 16 години брзо да стане славен откако почнал да ја објавува неговата музика.

Неговите песни во главно зборуваат за загубата на родителите, за тешкото детство без нив, но и за растењето со братот и сестрата.

Пред да настапи на Евровизија тој изјави дека тоа го прави во чест на неговите родители, со кого редовно го следел изборот додека бил мал.

Б. С. Б. | Црнобело