Платил над 30 милиони за да се разведе од сопругата за 65 секунди - Како Мистер Бин ги троши милионите?

Детали

сабота, 16 ноември 2024

За него велат дека е човек кого разводот скапо го чинел. Разводот му траел само 65 секунди, но за да се „ослободи од сопругата“ морал да ѝ купи палата и да ѝ остави милиони. Потоа платил милиони за да купи куќа во која ќе живее со љубовницата. Како Роуан Аткинсон ги троши парите?

Речиси да нема човек на планетата земја што не слушнал за Мистер Бин и актерот Роуан Аткинсон (69), кој се прослави благодарение на него. Актерот во својата блескава кариера успеа да заработи милиони, а се проценува дека неговото богатство во моментов тежи околу 150 милиони долари.

Тој се прослави играјќи го комичниот лик на Англичанецот кој насекаде оди со својот жолт Мини Морис и живее со најдобриот пријател мечето Теди, но, Роуан во приватен живот сака да ужива во луксузот и да води живот на висока нога, како и сите останати славни актери.

Роуан заработува од својата актерска кариера, од појавувањето во реклами, како и од пишувањето сценарија и работата како продуцент, но не штеди кога сака да ги задоволи сопствените потреби и желби.

Познато е дека Роуан во приватниот живот е огромен вљубеник во автомобили и има импресивна колекција.

Така во екот на својата слава, во 1997-ма година, кога неговите скечеви масовно се продаваа на аудиокасети низ целиот свет, Роуан успеал да најде супер редок автомобил McLaren F1, кој се смета за првиот хиперавтомобил.

Според неговите изјави, актерот за овој редок примерок во својата колекција платил околу 620.000 илјади долари.

Но, немал среќа долго време да ужива во него.

Две години откако го купил, имал сообраќајна несреќа и удрил во автомобил што возел пред него, па успеал да ја оштети предницата на автомобилот изработена од карбонски влакна. Не е познато колку пари потрошил за да го поправи автомобилот во тој период.

Во 2006-та година тој потрошил 3,2 милиони долари за да си купи имот од 1930-та година во срцето на Оксфордшир, во Англија, каде избрал да живее подалеку од папараците, бучавата и љубопитните очи на публиката.

Во тоа време, локалното население се радувало што британскиот актер ја купил старата историска куќа и ќе ја обнови, но актерот имал сосема поразлични планови за имотот.

Наместо да ја реновира старата куќа, тој одлучил целосно да ја сруши и на нејзино место да изгради ултрамодерен дом со стакло, и модерно уредување, кое според локалното население стрчи од околината, па затоа куќата ја нарекуваат „вонземска бензинска пумпа“.

Се проценува дека за да го изгради домот од соништата, актерот потрошил околу 7 милиони долари.

Во 2011-та година, актерот имал уште една несреќа со супер реткиот автомобил, која овојпат за малку можела да го чини и живот.

Познато е дека тој загубил контрола над возилото, по што удрил во дрво. Автомобилот се скршил на два дела и веднаш се запалил, а Роуан за среќа успеал да побегне.

Поправката на автомобилот траела цели 2 години и чинела околу 1,2 милиони долари. Но, една година подоцна, тој одлучил да го стави на аукција и го продал за 12,2 милиони долари.

Во истиот период, Роаун се соочувал со проблеми со имотот каде што го изградил домот од соништата, но и со бракот.

Во 2014-та година актерот се нашол среде развод со сопругата со која бил во брак 24 години Сунетра Састри, а со оглед на тоа што куќата била изградена во време кога тие двајца биле заедно, во таблоидите се пишуваше дека тој ќе мора да се откаже од куќата која ја градеше со години.

Документите за развод ги поднела сопругата, која го обвинила за неразумно однесување, затоа што тој одлучил да го напушти семејството и да живее со двојно помлада актерка од него.

Роуан во тој период ја запознал младата актерка Луис Фрод, која е 29 години помлада од него и веднаш се вљубил.

Роуан и Сунетра се разведоа во 2015-та година, во рекордно судско рочиште што траело само 65 секунди.

Но, за да може да постигне ваков договор, познато е дека на поранешната сопруга морал да ѝ купи имот вреден 26 милиони долари во Челзи и се верува дека ѝ платил дополнителни 7 милиони долари за да постигнат договор.

Тој во последните години живее со партнерката Луис и нивната ќерка Исла која ја добија во 2017-та година.

Актерот не живее во својата куќа од соништата, туку во домот што тој го купил во 2016-та година во Северен Лондон, по цена од 6 милиони долари.

Прочитајте и Факти за Мистер Бин, Роуан Аткинсон - има 26 години помлада девојка, на 62 години стана татко по трет пат

Б. С. Б. | Црнобело