Од американското шоу „Сè или нешто“, до војвотка и непријател на кралското семејство: Трансформацијата на Меган Маркл

Се проби со улогата во Suits

Единствената голема улога на Меган е во серијата Suits.

Овде, таа имаше една од главните улоги, а подоцна откри дека и самата била изненадена од успехот на серијата.

„Снимив први епизоди од безброј серии кои никогаш не беа емитувани. Па, не очекував дека Suits ќе се прослави“.

Првпат се венча на 30-годишна возраст

Првиот сопруг на Меган е актерот и продуцент Тревор Енгелсон.

Тие биле заедно дури седум години пред да се венчаат во Јамајка.

Сепак, се разделија само две години подоцна и никогаш не открија зошто.

Според извори блиски до Меган, таа била иницијаторот и наводно му го вратила прстенот на Тревор по пошта.

Врската со принцот Хари ѝ го промени животот

По Suits, Меган не успеа да добие значајна улога, но затоа, пак, врската со принцот Хари направи пресврт во нејзиниот живот.

Тие се запознале во 2016-та, а ја потврдија врската следната година.

Хари има изјавено дека немал поим дека е актерка, но наводно веднаш се вљубил во неа.

Стана војвотка

Нешто повеќе од една година откако ја почнаа врската, Меган и Хари се свршија. И, Меган стана една од најпознатите жени во светот.

Направија кралска венчавка во 2018-та, со што Меган ја доби и титулата војвотка.

Но, постепено се претвори во најголемиот непријател на кралското семејство.

До 2019 година, Меган и Хари го заладија односот со кралското семејство.

Меган, во стилот на покојната принцеза Дијана, даде неколку интервјуа и изјави во кои го напаѓа кралското семејство, а ги обвинува и за расизам.

Драмата кулминира во 2020-та, кога Меган и Хари официјално се откажаа од кралските должности и се преселија во САД.

Со ова, Меган стана еден од најголемите непријатели на британското кралско семејство.

Со Хари направи неколку (неуспешни) проекти

Меган и Хари снимија документарец за Нетфликс кој не доби најдобри критики.

Потоа Меган започна свој поткаст, но не успеа да потпише договор за втора сезона.

Неодамна, пак, објави свое шоу на Нетфликс, налик емисиите на Марта Стјуарт и иако доби лоши оценки и критики, наводно ќе се снима и втора сезона.

Спирова С. | Црнобело