Колин Фарел планира да го смести болниот син во установа: „Тоа го правам од љубов“

Детали

петок, 02 мај 2025

„Некои родители ќе речат: ‘Сакам да се грижам за моето дете’, и јас го почитувам тоа. Но, мојот ужас би бил... што ако утре добијам срцев удар, и, не дај Боже, мајката на Џејмс, има сообраќајна несреќа и двајцата нè нема, а тој остане сам?“ - вели Колин Фарел, кој сака да го смести својот син во медицинска установа.

Познатиот ирски актер Колин Фарел (48) неодамна откри дека тој и неговата поранешна партнерка, Ким Борденејв, планираат да го сместат својот 21-годишен син Џејмс во установа каде што ќе има постојана и долготрајна нега.

Џејмс страда од Ангелманов синдром, ретко генетско нарушување кое предизвикува тешки физички и интелектуални попречености и проблеми со говорот.

Фарел ретко зборува за синот и го чува подалеку од јавноста, но овој пат, во искрено интервју за списанието „Candis magazine“ раскажа за бројните предизвици со кои се соочува и Џејмс, но и Ким и тој како негови родители.

„Одлуката ја донесовме поради нашата љубов кон него, а не за да ни биде полесно. Некои родители ќе речат: ‘Сакам да се грижам за моето дете’, и јас го почитувам тоа. Но, мојот ужас би бил... што ако утре добијам срцев удар, и, не дај Боже, мајката на Џејмс, има сообраќајна несреќа и двајцата нè нема, а Џејмс остане сам?

Во тој случај државата ќе стане старател на Џејмс и тие нема да имаат никакво влијание врз тоа каде ќе биде сместен.

Затоа со Ким сакаме да најдеме место што ни се допаѓа, каде што може да оди уште сега, додека сме живи и здрави, место што ќе можеме да го посетиме, а понекогаш и да го изнесеме, да има исполнет и среќен живот“, рекол актерот.

Минатата година, актерот ја основа фондацијата „Колин Фарел“ во чест на својот син, а чија цел е да обезбеди поддршка, образование и да им помага на возрасни лица со интелектуална попреченост, кои се како неговиот син Џејмс.

Џејмс Фарел е роден во 2003 година. Првично, погрешно му била дијагностицирана церебрална парализа, бидејќи има слични симптоми како Ангелмановиот синдром.

Џејмс не можел сам да седи или да лази како бебе, поради што неговите родители направиле дополнителни тестови.

Тој имал околу две и пол години, кога педијатриски невролог се посомневал дека станува збор за Ангелманов синдром, откако забележал карактеристични симптоми за оваа болест, вклучувајќи чести напади на смеа без очигледна причина и специфични движења на рацете.

Оваа болест кое првенствено го зафаќа нервниот систем, предизвикува застој во развојот, проблеми со говорот (Џејмс не зборува), движењето и рамнотежата, тешки интелектуални потешкотии, а понекогаш и епилептични напади.

Луѓето со овој синдром обично имаат речиси нормален животен век, но им е потребна доживотна поддршка.

Карактеристиките на болеста вклучуваат лесна возбуда, среќно расположение и смеење без причина, хиперактивност, неможност долго да задржат внимание и фасцинација со вода.

И покрај сите предизвици, Фарел го опишува својот син како „магичен“. Џејмс, непосредно пред неговиот четврти роденден, ги направил првите чекори кон него.

„Никогаш нема да го заборавам изразот на решителност на неговото лице додека одеше кон мене. Направи шест чекори, беше толку магично“ - изјави актерот одамна за списанието People.

Иако и денес на Џејмс му треба помош од негувател, тој постигнал уште еден значаен успех и на 19 години почнал самостојно да се храни.

Освен Џејмс, Фарел го има и 15-годишниот син Хенри (15), а го доби со полската актерка Алиција Баледа - Куруш.

Прочитајте и Колин Фарел со ретка изјава за 20-годишниот син со пречки во развојот: „Само сакам луѓето да бидат добри со него“

А. Ј. | Црнобело