На 17 роди син откако беше силувана, го одгледа како брат - Животот на Клаудија Кардинале, која почина на 87 години

Детали

среда, 24 септември 2025

Легендарната италијанска актерка, Клаудија Кардинале, музата на Федерико Фелини, почина на 87 години близу Париз. Важеше за една од најубавите актерки во 20-тиот век. И покрај тоа што беше обожавана и секогаш насмеана, зад затворени врати помина низ сè - од силување по кое остана бремена, до глобален успех.

Клаудија Кардинале израснала во Тунис во семејство со сицилијанско потекло. Влегла со светот на филмот во 1957 година, откако победила на натпревар за убавина во Тунис и добила патување на Венецискиот филмски фестивал.

За првите филмски улоги нејзиниот глас морал да биде синхронизиран за чист италијански јазик, зашто имала силен сицилијански дијалект.

Со нејзините природно убави црти на лицето, темни очи и сексуалноста, со која зрачеше уште од тинејџерските години, привлекуваше внимание каде и да се појавуваше.

Но популарноста и убавината ѝ донесоа многу работи, не само успех, туку и тага, болка и несигурност.

На само 17 години, Клаудија била силувана, забременила, но одлучила да го роди детето.

„Во тоа време поминував низ некои многу деликатни моменти во мојот живот. Човек што не го познавав, многу постар од мене, ме натера да влезам во автомобил и ме силуваше. Тоа беше ужасна работа, но и најубава работа - мојот прекрасен Патрик се роди од тоа насилство.

И покрај фактот дека тоа беше многу комплицирана ситуација за мајка, решив да не ја прекинам бременоста.

Кога тој човек дозна за мојата бременост, се врати во мојот живот, барајќи да ја прекинам. Но, ниту за момент не помислив да се ослободам од моето бебе“, изјавила таа во едно интервју.

Со родителите и сестра ѝ Бланш решиле детето да порасне во семејството, како помлад брат.

„Смешниот дел од приказната беше што веќе почнав да работам на филмот, и речиси до крајот никој не забележа дека сум бремена“, рекла Клаудија.

До самото раѓање на бебето таа останала во Лондон, каде за неа се грижел нејзиниот продуцент Франко Кристалди, а откако се породила, се вратила дома, каде што сите почнале да се преправаат дека новороденчето е всушност нејзин помлад брат.

Но, тука не завршило искушението на младата актерка.

„Почнав врска со Кристалди, тој сакаше да ја чувам тајната за раѓањето на бебето, но не сакаше тоа да живее со нас.

За него, јас бев само подреден вработен, на кого му даваше мала месечна плата за четири филма годишно: дури и не го викав по име, туку по презиме. Бев наивна, не знаев ништо кога го потпишав договорот со него.

Се чувствував како заложник, татко ми и мајка ми беа бесни. Нашата свадба беше исто така деловна, тој ја закажа свадбата во најголема тајност без да ми каже ништо“, рекла таа.

По свадбата, тие како двајца странци, живееле во две одделни куќи близу Рим - Кристалди имаше една куќа за себе, а другата за Клаудија.

Сопругот ѝ бил посесивен и љубоморен, го следел секој нејзин потег, па по осум години таков брак, се разведоа во 1975 година.

Сепак, Клаудија ја пронајде вистинската љубов во својот живот. Се омажи за режисерот Пасквале Сквитери, со кого имаше ќерка.

Во едно интервју таа рече дека тој е единствениот вистински маж во нејзиниот живот.

По 30 години заеднички живот, тие се разведоа, но таа никогаш не кажа ниту еден лош збор за него.

Инаку, престижниот „Индепендент“ ја прогласи Клаудија за број 1 на листата на најголемите италијански културни феномени.

„Некои би рекле Лорен, некои Лолобриџида или Белучи, но од сите италијански божици, госпоѓа Клаудија Кардинале беше најзапаметена - подеднакво пленеше и кога косата ѝ беше разбушавена и уредно исчешлана, кога беше намуртена или палава, но секогаш изгледаше необјасниво живо и блескаво“, пишува во магазинот.

Таа, пак, се појави на повеќе од 900 насловни страници во повеќе од 25 земји.

Клаудија беше еден од најголемите секс симболи, а никогаш не се фотографираше гола.

А. Ј. | Црнобело