По 15.000€ месечно за секое дете - Зошто судот одреди огромна алиментација за децата на Ана и Бастијан?

Детали

петок, 30 јануари 2026

Шпанскиот суд одреди огромна сума пари која поранешниот германски фудбалер Бастијан Швајнштајгер треба да ја издвојува месечно за своите три сина - сумата надминува половина милион евра годишно...  

Поранешниот германски фудбалер Бастијан Швајнштајгер, наводно плаќа 45.000 евра месечна алиментација за децата кои ги има од бракот со некогашната тенисерка Ана Ивановиќ.

Тоа е над пола милион евра годишно, односно 540.000 евра кои Бастијан мора да ги издвои од својата заработка, а ќе ги плаќа до полнолетството на децата.

Ана и Бастијан објавија дека се разведуваат во пролетта 2025-та, а брзо потоа се дозна дека не живееле заедно скоро две години. Брзо потоа Германецот беше фотографиран со нова девојка.

Ана, пак, остана да живее со нивните 3 деца на Мајорка.

Според луксузниот животен стил што го имало семејството додека Ана и Бастијан биле во брак, судот во Мајорка му наредил на Швајнштајгер да плаќа алиментација од по 15.000 евра месечно за секое дете, односно вкупно 45.000 евра секој месец.

Оваа сума е утврдена како дел од таканаречените „привремени мерки пред главната постапка“, што е вообичаено во Шпанија кај разводите во кои се вклучени малолетни деца.

Иако главната бракоразводна постапка се води во Минхен, Ана живее на Мајорка со синовите Лука (8), Леон (5) и Тео (2), па затоа шпанскиот суд ја донесе оваа одлука.

Судот ја објаснил високата алиментација поради големата финансиска моќ на Бастијан, но и поради претходните трошоци на семејството.

Според судските документи, пред разводот, тие трошеле од 6.000 до 7.000 евра месечно само за храна.

На децата им помага вработен кој се грижи за нив и го води домаќинството, а пресметката ги вклучува и трошоците за персоналот - градинар, готвач и две слугинки.

Дополнително, секое дете има своја дадилка.

Судот ги зел предвид и високите приходи на Швајнштајгер, но се вели дека е тешко прецизно да се утврдат колкави се, бидејќи тој плаќа даноци во Германија.

За потсетување, Ана и Бастијан се венчаа во Венеција во 2016 година, а нивниот брак изгледаше идиличен скоро цела деценија.

Додека беа заедно, живееја на релација Чикаго, Белград, Минхен и Мајорка.

А. Ј. | Црнобело