Славните со поддршка за Бритни Спирс – објавен контроверзен документарец кој прикажува како била злоупотребена

Детали

вторник, 09 февруари 2021

Деновиве на стриминг платформата Hulu се појави документарецот Framing Britney Spears во кој е прикажан голем дел од неправдата со која се соочува пејачката. Документарецот предизвика лавина реакции и многу славни ја дадоа својата поддршка за Бритни.

Документарецот Framing Britney Spears се фокусира на минатото на пејачката и настаните кои воделе до нејзината сегашна состојба.

Моментално, Бритни нема никаква контрола над нејзините финансии и нејзиниот приватен живот и сите одлуки ги донесува татко ѝ, а ова се случува од 2008-ма година. Татко ѝ ја има улогата на еден вид старател.

Во САД, ако се утврди дека личноста не може да се грижи за себе, судиите можат да одредат ваков старател, кој ќе има контрола над практично секој аспект од нејзиниот живот. Токму тоа се случува со Бритни и татко ѝ откако, наводно, било утврдено дека пејачката не е во состојба да одлучува за себе.

Проблемот е што оттогаш, Бритни има одржано многу настапи, има издадено четири албуми, а беше и судија на The X-Factor, што значи – пејачката е повеќе од способна да се грижи за себе.

Оттука произлезе и движењето Free Britney, кое го започнаа група фанови кои сакаат Бритни да ја добие контролата над својот живот. Бритни, пак, само сака некој друг да ја има оваа улога, а не татко ѝ.

Во документарецот е прикажана токсичната средина во која работела Бритни уште од почетоците на кариерата, односот со нејзиниот татко и неговото старателство, како и движењето Free Britney, кое станува сè посилно од прикажувањето на филмот.

Во понеделникот, ден-два после премиерата на документарецот, Бритни сподели видео за кое фановите мислеа дека се однесува на документарецот. Но, во видеото пејачката вели:

„Моментот кој сите го чекавме минатата недела… натпреварот Super Bowl!“, а потоа продолжува да зборува за тој настан.

https://www.instagram.com/p/CLC8ARkg65P/

Пред документарецот, ѕвезди како Парис Хилтон и Роуз Мекгован споделуваа дека Бритни ја заслужува својата слобода, но сега сè повеќе славни личности го изјавуваат истото.

Мајли Сајрус, која настапуваше пред да почне натпреварот Super Bowl, на крајот од настапот извика „Ја сакаме Бритни!“.

Сара Џесика Паркер објави твит со хаштагот на движењето:

#FreeBritney

— Sarah Jessica Parker (@SJP) February 7, 2021

Хејли од бендот Paramore исто така ја даде својата поддршка:

„Ниту еден артист не треба да ја почувствува тортурата што ѝ ја предизвикале медиумите/општеството/мизогинистите. Не би го правеле овој разговор за подигање на свеста за менталното здравје ако таа не ја платеше ужасната цена“.

https://twitter.com/yelyahwilliams/status/1358093963467620360

„Добро утро! Имајте убав ден! И: Ослободете ја Бритни“, напиша на Твитер Енди Коен.

🌞 Good morning!🌞 have a great day! And: #FreeBritney

— Andy Cohen (@Andy) February 8, 2021

Луѓето кои веќе го поддржуваа движењето сега станаа погласни и се обидуваат да ѝ покажат на јавноста со што сè се соочила Бритни, нагласувајќи дека секој би „експлодирал“ како Бритни, алудирајќи на инцидентот од 2007-ма, кога пејачката си ја избричи главата.

„Замислете си секој ден да ве следат над 70 папараци само за да ве фотографираат. Жал ни е Бритни“, гласат повеќето од објавите на фановите.

Во меѓувреме, можеби за првпат, во јавноста се огласи новото момче на Бритни, Сем Ашгари. Во ексклузивна изјава за PEOPLE, 27-годишниот актер сподели:

„Отсекогаш сум го сакал само најдоброто за мојата поубава половина, и ќе продолжам да ја поддржувам во нејзините соништа и нејзината цел да ја создаде иднината што ја сака и заслужува. Благодарен сум за љубовта и поддршката што ја добива од фановите ширум светот и се надевам дека заедно ќе имаме нормална, неверојатна иднина“.

Според документарецот, за сегашната состојба на Бритни не е виновен само нејзиниот татко, туку и луѓето со кои соработувала, па дури и Џастин Тимберлејк, со кого беше во врска на почетокот од 2000-тите.

Пејачката уште нема прозборено за филмот, но фановите и ѕвездите што ја поддржуваат се надеваат дека со обелоденување на вистината, Бритни конечно ќе ја добие својата правда.

Погледнете и Татко ѝ ги менаџира парите и социјалните мрежи – Бритни Спирс бара од судот контрола над својот живот

Спирова С. | Црнобело