Ѕвездата од серијата „Riverdale“ осудена на доживотна казна затвор за убиството на мајка си

Детали

петок, 23 септември 2022

Ужасна приказна за згаснувањето на една млада ѕвезда и тргнувањето по погрешен пат. Грозоморниот чин кој го ужасна светот доби разрешница. Рајан Грантам (24) е осуден на доживотна казна затвор за застрелувањето на мајка си...

Рајан Грантам (24), актер од Канада, познат по улогата во серијата „Riverdale“, кој пред судот призна дека ја убил својата мајка за да ја поштеди од тоа да гледа кога тој ќе го убие канадскиот премиер Џастин Трудо, сега е осуден на доживотна казна затвор.

Рајан ќе може да побара условно, дури по 14 години, а осуден е за убиство од втор степен.

Тој ја застрелал мајка си одзади додека таа свирела на пијано во март 2020 година. Барбара Вајт починала на 64-годишна возраст од рацете на својот син.

Потоа, тој се упатил кон резденцијата на Џастин Трудо со три пиштоли во автомобилот, муниција, молотови коктели, и што уште не, но се премислил и одлучил да им се предаде на властите и да го признае убиството на мајка си.

За убиство од втор степен според канадскиот закон веднаш се добива доживотна казна затвор и единствено за што адвокатот може да се бори е за тоа по колку години обвинетиот ќе може да побара да отслужува условна казна.

Рајан го призна своето дело и изрази жалење за постапките, а прифати и психијатриска помош во затворот.

Инаку, по убиството на мајка му Рајан дури снимил видео на кое вели „Ја застрелав во задниот дел од главата“ и го покажал нејзиното безживотно тело.

Ја покрил со чаршаф, си легнал, а наредниот ден ставил свеќи до нејзиното тело пред да тргне во реализација на планот за Трудо.

Планирал да патува 50 часа за да стигне до него, но се предал во полиција во Ванкувер.

На Рајан му биле дијагностицирани повеќе психички нарушувања кои довеле до овој грозоморен чин.

„Не можам да ги објаснам или оправдам моите дела. Немам оправдување. Ме боли кога ќе помислам колку ужасно си го прокоцкав животот. Да кажам извини е бесмислено, но од секој атом на моето тело се каам и велам извини“, изјави тој пред судот.

Покрај по Riverdale, тој е познат и по улогата во серијата Supernatural, како и филмовите Diary of a Wimpy Kid и The Imaginarium of Doctor Parnassus.

С. С. | Црнобело