„Секогаш ќе ти бидам безнадежно посветен“: Џон Траволта се расплака на Оскари 2023 и емотивно се потсети на Оливија Њутн Џон (видео)

Детали

понеделник, 13 март 2023

Холивудскиот актер Џон Траволта (69) не успеа да ги задржи солзите и со растрепен глас го најавуваше сегментот за холивудските ѕвезди што починаа изминатата година, а меѓу нив и неговата партнерка од филмот „Grease“ и долгогодишна пријателка, Оливија Њутн Џон.

Вчеравечер во театарот „Dolby“ се одржа 95-тата церемонија на доделувањето на Оскарите, а покрај филмските награди и аутфитите, еден од најемотивните моменти беше говорот на Џон Траволта, со кој ѝ оддаде почит на Оливија Њутн Џон, која пред неколку месеци почина од рак.

Додека им оддаваше почит на некои од најголемите холивудски ѕвезди кои починаа изминатава година, Траволта ги замоли публиката и гледачите да се сетат на неговите врсници од забавната индустрија кои повеќе не се меѓу нас.

„Тие ни ги допреа срцата, нè насмеаја и станаа драги пријатели на кои секогаш ќе им останеме безнадежно посветени“, рече глумецот, цитирајќи го насловот на една од најпопуларните песни што Оливија ги пееше во нивниот заеднички филм од 1978 година, Greasе“.

https://youtu.be/Fqiqmvbvsb0

Траволта едвај успеа да ја заврши својата реченица без да заплаче, па го повика Лени Кравиц на сцената.

Кравиц на пијано го изведе својот хит од 2004 година, Calling All Angels, додека на екранот одеа ликовите на актерите и филмските работници кои починаа изминатата година, вклучувајќи ги Реј Лиота, Анџело Бадаламенти, Жан-Лук Годар, Ајрин Кара, Џули Рајчерт, Бурт Бахарах, Анџела Лансбери, Мери Алис, Џејмс Кан и Ракел Велч.

Емотивната реакција на Траволта ги трогна и фановите кои велат дека ова била една од најискрените реакции на Оскарите 2023.

„Кутриот Џон Траволта. Неодамна изгуби три љубови на својот живот: неговата сопруга Кели Престон, Оливија Њутн Џон и Кирсти Ели. Тоа е многу за секого!“ - пишуваат на Твитер.

А. Ј. | Црнобело