„Тато ти си најдобар“ - Ѓоковиќ во солзи ги прегрнува Јелена и децата, по освоеното злато

Детали

понеделник, 05 август 2024

„Ги дадов срцето, душата, телото и сѐ што имав за да освојам олимписко злато и на 37 години, конечно успеав“ – рече Ноле, по завршувањето на натпреварот со Карлос Алкараз. Емотивните мигови со неговото семејство се објавени во сите светски медиуми.

Српскиот тенисер Новак Ѓоковиќ уште еднаш покажа дека поседува извонреден талент, а посветеноста, упорната работа и напорните тренинзи му го донесоа првиот златен медал на Олимпијадата.

По поразот на Вимблдон, Ноле вчера (04.08) уште еднаш се сретна со младиот Карлос Алкараз во рамки на натпреварувањата на Олимпијадата во Париз, и овојпат успеа да го освои првото олимписко злато во неговата кариера.

Ова воедно е прв златен медал за Србија во тенис на олимпијадите.

По завршувањето на натпреварот среќата беше неизмерна, а српскиот тенисер, поведен од емоциите, веднаш се качи на трибините, од каде го бодреа сопругата Јелена и децата Стефан и Тара.

„Не знам што да ви кажам, сѐ уште сум во шок. Ги дадов срцето, душата, телото, сѐ што имав за да освојам олимписко злато и на 37 години, конечно успеав“ – изјави Ноле за светските медиуми.

Голем број српски јавни личности му честитаа на Ноле, преку социјалните мрежи, а прва се огласи и неговата сопруга Јелена која објави заедничка фотка, на која Ноле е заедно со неа и со децата.

До фотката, Јелена само накратко напиша:

„Златен, а наш. Ова е златното момче од Србија“.

Во магазинот Vogue, се објавени повеќе емотивни моменти од натпреварот, каде што може да се види транспарентот што малата Тара го држи во рацете, а на кој пишува:

„Тато е најдобар!“

Исто така, објавена е и фотката од страстниот бакнеж меѓу Ноле и Јелена, откако тој успеа да го оствари својот долгогодишен сон.

Погледнете повеќе фотографии во продолжение:

Б. С. Б. | Црнобело