Невозможен скок на Том Круз, перформанс во чест на Грција – Како изгледаше затворањето на Олимпијадата во Париз?

Детали

понеделник, 12 август 2024

„Застрашувачки“, „Сатанистички“... вака твитерџиите ја доживуваат мрачната церемонија за затворање на Олимписките игри во Париз... Сепак, се чини дека невозможниот скок на Том Круз ни најави нови, повозбудливи и позабавни перформаси во сончевата Калифорнија, во 2028-ма година.

Со свечено затворање, синоќа (11.08) беше означен крајот на овогодинешните Олимписки игри, кои се одиграа во Париз, а знамето потоа му е предадено на Лос Анџелес, следниот град кој ќе биде домаќин на еден од најважните спортски настани.

Церемонијата за затворањето се одвиваше на два континенти.

Додека публиката во Париз се поздрави со спортистите кои годинава имаа можност да се борат за олимписки медал, во Калифорнија, со посебна церемонија беше означен моментот кога тие ја преземаат одговорноста за организирање на настанот.

Она што на сите им привлече внимание за време на затворањето на игрите, беше скокот на Том Круз, кој облечен во препознатливата црна јакна од филмот Top Gun, изведе речиси невозможен скок пред илјадниците присутни, со што беше означено предавањето на олимпиското знаме.

Том Круз (62) го зеде знамето од гимнастичарката Симон Бајлс и градоначалничката на Лос Анџелес, а потоа заедно со него замина качен на мотоцикл, додека голем број спортисти го поздравуваа.

Погледнете го видеото од моментот кога Том Круз го изведе невозможниот скок:

Друг момент што посебно привлече внимание беше делот којшто беше посветен на земјата која за првпат ја започнала традицијата на Олимписките игри.

Со посебен перформанс, интонирање на националната химна и веење на националното знаме, посебна чест ѝ беше оддадена на Грција.

Слично како и на церемонијата по повод отворањето, и на синоќешната церемонија имаше некои необични појави, како златниот човек-пчела кој низ француската историја е познат како Златен Патник.

Освен тоа, имаше и обезглавена статуа на ангел, која е симбол на француската Револуција и Падот на Бастилја.

На сцената имаше и перформанс на луѓе облечени како мумии.

Сѐ на сѐ затворањето на годишната Олимпијада имаше темен, застрашувачки призвук, па оттука, она што се случуваше на другата страна преку Атлантскиот Океан, дојде како вистинско освежување.

Во сончевата Калифорнија, со церемонија беше означено преземањето на Олимпиското знаме, а по тој повод имаше настапи на Red Hot Chilly Peppers, Били Ајлиш и Снуп Дог.

Препознатливиот знак во Hollywood, беше изменет во чест на Олимписките игри што ќе се одржат таму во 2028-ма година.

Прочитајте и Знамето го кренаа наопаку, настап на Селин Дион – Највпечатливите мигови од отворањето на Летните Олимписки игри 2024

Б. С. Б. | Црнобело