Скопје - домаќин на квалификацискиот турнир за Европското футсал првенство

Да ја бодриме нашата футсал репрезентација, за историски пласман на големо првенство!

Македонските спортски репрезентации се почесто ги гледаме на завршните турнири на европско и светско ниво. Во таа ситуација може да се најде и Македонската А футсал репрезентација.

Имено, станува збор за Европското првенство во футсал, чија квалификациска група 2 ќе се одигра токму кај нас, во спортскиот центар „Борис Трајковски“. Освен домашниот терен, шансите за пласман ги зголемува и поволниот ждреб на противниците: тимовите на Унгарија и Швајцарија како конкурентни противници, и бронзениот тим на Шпанија од последното европско првенство – како дополнителна атракција.

Првиот меч го играме со Унгарија, на 18 март. Нашата цел е победа над овој тим, и на тој начин да обезбедиме најмалку учество во бараж турнирот на европското првенство. Тимот е во добра форма која што ја докажа со последните две победи над репрезентацијата на Грузија, која што по квалитет е блиска до ранкот на Унгарија. Тоа што и преостанува на нашата селекција е дополнителна мотивација. За тоа се потребни навивачите, а Македонците тука се одлични, и доколку би постоело Европско првенство во навивање, сигурно би се пласирале на финалните турнири.

Ако се уште се двоумите, уште некој збор два за малиот фудбал и што има тој да понуди за гледачите во живо: многу повеќе динамика, голови и атракции за разлика од поголемиот негов брат.

Причина плус за посета на овие натпревари е и можноста безгрижно да ги понесете и припадничките од понежниот пол, како и најмалите, затоа што не сте изложени на милоста на временските услови - се наоѓате на топло и суво, во удобноста на нашите современи сали, каде што се изиграле голем број на историски мечеви на кои вие најверојатно веќе и сте присуствувале.

Само потсетете се на доживувањето, и тоа нека ви биде поттик повеќе за  присуство на овој одличен спортски настан во живо. Се гледаме на 18 март!