„11 години живеам со болки, открив дека лекарите ми заборавиле игла и конец во стомакот по породувањето“

Детали

среда, 26 април 2023

„Постојано одев на лекар, а таму ми даваа само парацетамол за да ми поминат болките“ – вели оваа жена од Колумбија, која неодамна дознала дека 11 години живее со игла и конец во стомакот, што биле заборавени за време на интервенцијата за врзување на јајцеводите.

Марија Адерлинда Фореро (39) од Колумбија цели 11 години трпела неподносливи болки, сѐ додека со магнентна резонанца не било откриено дека причината за тоа е предизвикана од ненамерна лекарска грешка.

Марија која потекнува од едно село во Колумбија за тамошните медиуми раскажува дека во 2012-та година, откако го родила 4-тото дете, била на операција за врзување на јајцеводите со цел да ги спречи идните бремености.

Но, лекарите што ја изведувале операцијата направиле ненамерна грешка и во стомакот на жената оставиле игла и конец пред да ја сошијат.

Марија прво верувала дека болката е нормална во постпородилниот период и дека со текот на времето ќе помине, а вели дека подоцна лекарите ѝ велеле дека е нормална последица на интервенцијата за врзување на јајцеводите.

„Само неколку денови по операцијата почнав да чувствувам болки, кои не престануваа, па почнав да одам во амбулантите во близина, а таму ми даваа само парацетамол за болката и ми велеа да си одам дома“ – раскажува Марија.

Болките станувале неподносливи, па дури и целосно го нарушиле начинот на живот на оваа мајка. Таа вели дека морала постојано да бара нова работа, затоа што никој не сакал да ја задржи на работното место бидејќи постојано е болна.

Како што раскажува, болката била неподнослива: не можела да се движи, ниту да спие, а за секоја посета во болница морала да патува околу 2 часа со мотоциклот на нејзиниот сопруг.

Во еден момент лекарите одлучиле да ѝ препишат посилни таблети против болка, но, ниту тоа не ѝ помогнало.

Речиси цела деценија подоцна, во ноември 2022-ра година таа закажала преглед со магнетна резонанца и ехо-преглед, кога било откриено дека во стомакот има необичен предмет.

„Лекарката ми рече дека за време на операцијата ми оставиле игла и конец во стомакот. Таа не можеше да верува што гледа, а јас не можев да поверувам што слушам“ – раскажува Марија.

Таа ги земала резултатите од прегледите и го побарала лекарот што ја оперирал пред 12 години, а кога ги видел, тој ѝ рекол дека сигурно грешката не е негова, а можно е таа сама да голтнала игла и конец.

Марија во моментов чека да добие термин и да најде лекар што е подготвен да ја оперира за да се отстрани предметот и конечно да се ослободи од страшните болки, но и од опасностите што може да ги предизвика по нејзиното здравје.

„Ми треба итно да ме оперираат и да го отстранат, затоа што не сакам да починам и да ги оставам децата“ – вели Марија.

Инаку, долгогодишното присуство на метален објект во телото може да предизвика низа здравствени компликации, а со текот на времето може да предизвика и рак.

Б. С. Б. | Црнобело