Мислела дека е дехидрирана – Млада мајка од САД почина откако испила 4 шишиња вода во 20 минути

Детали

петок, 04 август 2023

„Чувствуваше главоболка и велеше дека никако не може да ја изгасне жедта“ – тврди братот на 35-годишната Ешли Самерс од САД, која почина откако испила премногу вода. Освен што треба да се внимава на дехидрираност и претераното пиење вода може да предизвика смрт.

Ешли Самерс (35) од Индијана, САД, починала откако испила околу 2 литри вода во 20 минути. Според информациите во странските медиуми, жената претрпела труење со вода.

Ешли со семејството биле на езерото Фримен по повод Денот на независноста на САД, 4-ти јули, а почнала да се жали дека чувствува главоболка и симптоми на дехидрираност.

Таа велела дека колку и да пие течности, не може да ја изгаси жедта.

Според изјавите на нејзиниот брат, Девон Милер, младата Американка испила 4 шишиња од околу 500ml, или вкупно околу 2 литри вода во само 20-тина минути.

„Тоа е количината вода што треба да ја испиеме во текот на цел ден“ – вели во изјава за The Sun, брат ѝ.

Кога стигнале дома, Ешли колабирала во гаражата и имала отекување на мозокот, по што веднаш била пренесена во болница, но загубила свест и никогаш повеќе не се разбудила.

Според медицинските лица, жената починала од труење со вода, познато и како хипонатремија, состојба што се јавува како последица на тоа што во телото има премногу вода, а нема доволно минерали.

Кога пиеме преголемо количество вода за кратко време, се разредува нивото на минерали во телото, а тоа ги оптоварува органите во телото, пред сѐ бубрезите, кои се обидуваат да го регулираат нивото на течности.

Симптомите на хипенатремија вклучуваат грчеви во мускулите, болки во телото, гадење, повраќање и главоболки.

Во сериозни случаи може да дојде до отекување во мозокот, што води до збунетост, напади, кома и смрт.

Мајката на две деца била донор на органи, па по нејзината смрт, нејзините органи биле донирани и биле спасени пет други животи, а нејзината приказна се пренесува во странските медиуми како предупредување дека во текот на жешките денови треба да се биде умерен и со пиењето вода.

Б. С. Б. | Црнобело