„Вежбав 7 дена како Марго Роби - колку се напорни тренинзите за да се добие тело како 'Барби'?“

Детали

недела, 13 август 2023

„Додека пилатесот и кревањето тегови ми се познати, балетот ми ги вежба мускулите на начин на којшто не бев свесна дека е можен и ова е најтешката вежба досега“ – откри новинарката Бриди Вокинс која 7 дена ја испробала фитнес рутината на Марго Роби. Погледнете што прави актерката за да изгледа како „Барби“?

Освен што држела посебна диета, за да добие тело на Барби, Марго Роби за филмот имала и утврдена фитнес рутина за вежбање, што нималку не е лесна.

„Здравата исхрана и вежбањето мора да преовладуваат во мојот живот за да може да се чувствувам најдобро што може, но не сакам премногу да размислувам за тоа“ – рече во една пригода Марго Роби.

Познато е дека таа доста посветено се подготвува за филмските улоги, што е видливо и во филмот Barbie, но да не заборавиме дека истовремено се залагаше и за тоа брендовите да почнат да произведуваат и малку поинакви дизајни на кукли, па така настанаа и барбиките со облини, но и барбиките со Даунов синдром.

„Мислам дека не треба да речеме, Барби е само во ваква верзија и дека жените треба да се трудат да изгледаат и да се однесуваат како неа“ – рече таа.

Но, ако се остави сѐ друго настрана, јасно е дека Марго мошне напорно вежба за да ја постигне линијата по која е препознатлива и да наликува на популарната кукла.

Новинарката Бриди Вокинс една седмица се обидела да вежба како Марго Роби, а за весникот Woman’s Health ги раскажува своите впечатоци.

Накратко, фитнес рутината на Марго Роби изгледа вака:

• Понеделник: 60 минути пилатес вежби + 100 чучнувања;
• Вторник: 60 минути вежби со тегови + 100 чучнувања;
• Среда: Ден за одмор;
• Четврток: 30 минути вежби за стомачните мускули (дополнително 100 чучнувања);
• Петок: 60 минути вежби по балет + 100 чучнувања;
• Недела: Ден за одмор.

По седумдневно придржување до фитнес рутината на Марго Роби, новинарката извлече неколку интересни заклучоци.

Како што вели, со оглед на тоа што претходно вежбала пилатес и кревање тегови, воопшто немала проблем да се придржува до овие делови од фитнес рутината на Марго, но мака мачела со чучнувањата.

Иако, вториот ден се обидела да ги подели во две серии од по 50 чучнувања наутро и 50 чучнувања навечер, таа се чувствувала преуморно.

Особено била изненадена од вежбите во петтиот ден, кога требало да вежба балет.

„Додека пилатесот и кревањето тегови ми се познати, балетот ми ги вежба мускулите на начин на којшто не бев свесна дека е можен и ова е најтешката вежба досега.

Ме болат мускулите што не ни знаев дека ги имам и морам да одморам за да земам здив, но мислам дека ќе стане полесно кога ќе ги научам добро вежбите“ – вели таа.

„Еден елемент што со сигурност нема да го преземам од рутината на Марго Роби се 100-те чучнувања. Јасно, го зајакнуваат целото тело и даваат подобар баланс, координација, држење, добри се за ослободување на болките во грбот, но тие примарно делуваат само на долниот дел од задникот“ – вели таа.

Но, иако е мошне напорна, Бриди вели дека многу ѝ се допаднала фитнес рутината на Марго, откако сфатила дека може вежбите да ги скрати, за да не се чувствува преуморно и да нема сила ниту да мисли.

За крај, Бриди вели дека и покрај сѐ оваа рутина ѝ помогнала да се чувствува подобро и дефинитивно ќе продолжи да применува дел од нејзините вежби, но во онаа мера во која се чувствува добро, а не за да добие тело на Барби.

Б. С. Б. | Црнобело