Потег за аплауз! Директорот на авиокомпанијата Lufthansa работеше како стјуард за да се стави во чевлите на вработените

Детали

четврток, 24 август 2023

Извршниот директор на авиокомпанијата Lufthansa, кој претходно работел како пилот, решил да биде стјуард на еден од летовите. Во инспиративна објава на LinkedIn, тој вели дека искуството било прекрасно, но и дека научил многу за работата на стјуардесите.

Џенс Ритер е извршен директор на авиокомпанијата Lufthansa од април 2022 година. Пред да дојде на позицијата, самиот работел како пилот, а потоа имал и други функции во авиокомпанијата.

Неодамна на својот LinkedIn профил тој откри дека одлучил да биде стјуард на еден од летовите на компанијата.

Џенс сподели и неколку фотки од искуството, како и заедничка фотка со екипажот од летот.

„Некогаш треба да ги промените перспективите за да добиете нов увид. Оваа недела го придружував екипажот на летот на Lufthansa Airlines кон Ријад и Бахреин како ’дополнителен член на екипажот‘. Какво искуство!

Многу години работам за Lufthansa Group. Но, никогаш сум немал можност да работам како дел од авионскиот екипаж. И, искрено, беше многу интересно, но и исполнето со предизвици!

Бев фасциниран од тоа колку има за организирање, особено ако нешто не оди по план – на пример, оброците на менито не беа оброците кои се наоѓаа во авионот.

Беше интересно индивидуално да обрнам внимание на желбите на гостите, да се справам со различната енергија што ја имаат сите.

Порано летав како пилот и мислев дека знам за предизвиците кои доаѓаат со ноќни летови. Но, да бидете присутни и шармантни и да обрнувате внимание – кога биолошкиот часовник само ви вели да спиете – беше нешто сосема различно.

Екипажот беше прекрасен и веднаш ме прифати во тимот. Со нивната поддршка, можев да помогнам во бизнис класата на летот до Ријад.

Назад кон Франкфурт, во текот на ноќта, се погрижив за гостите во економската класа. И искрено, уживав во секој момент!

Вчудовиден сум од тоа колку научив во овие неколку часа. Одлучив дека работите во канцеларијата ќе бидат различни откако навистина го почувствував влијанието на одлуките во авионот.

Му благодарам на прекрасниот екипаж, пријатните гости и сите кои ми го овозможија ова искуство“, вели тој во објавата на LinkedIn.

Во коментари има поддршка за него, како и коментар од една стјуардеса која работи во авиокомпанијата.

„Го имаме најдобриот извршен директор. Одличен потег и вистинска инспирација“.

Спирова С. | Црнобело