Татко од Канада се жали: „Ги однесов децата во Дизниленд - потрошив цело богатство за да не чекам по 2 часа за возење“

Детали

среда, 06 септември 2023

„Не одете во Дизниленд. Се срамам од тоа колку пари потрошив за еден ден со семејството таму“ – вели татко на две деца од Канада, кој на социјалните мрежи се пожали дека најпознатиот тематски парк во Париз е машина за трошење пари.

Марио Зелаја од Канада, заедно со своите две деца неодамна бил во посета на Париз и сакал да им приреди на своите деца незаборавно искуство во Дизниленд, но сега се жали дека се покајал, затоа што не очекувал колку многу пари ќе потроши.

Тој на ТикТок објави видео во кое вели дека Дизниленд е најголемата машинерија за трошење пари, а вели дека направил огромна грешка што воопшто одлучил да го посети.

„Направив огромна грешка, отидов во Дизниленд во Париз. Сега се срамам од тоа колку многу пари потрошив.

Само за билети дадов 1.200 долари. Зошто го направив тоа?“ – вели тој на почетокот на видеото.

Марио појаснува дека обичните билети се продаваат по цена од 120 долари, но семејството купило премиум билети, што се за 173 долари поскапи од човек, со цел да ги прескокнат долгите редици и побрзо да стигнат до секоја од содржините во паркот.

Со оглед на големата толпа, за секоја од содржините се чекало по еден час и 15 минути, но со премиум билетите, тие успеале да ги прескокнат долгите редици.

Тој пресметал дека ако за секоја од содржините чекале редици со регуларни билети, тогаш би требало да поминат повеќе од 25 часа во стоење.

„Ова се правилата на Дизниленд: Очекувајте долги чекања што граничат со лудило, а ако не сакате да чекате редици, тогаш ќе треба да платите огромна сума за премиум билети.

Ако одлучите да чекате на ред затоа што премиум билетите не се однесуваат на сите содржини, повторно треба да очекувате огромна сметка“ –  вели тој во описот на видеото.

Голем број од неговите следбеници се сложуваат со неговите тврдења и велат дека не сфаќаат зошто некој би чекал цели два часа за петминутно возење на некои од содржините во паркот, а други напоменаа дека ако одите треба да бидете свесни и дека храната е прескапа и дека никогаш повеќе нема да одат таму.

Погледнете го видеото на Марио:

https://www.tiktok.com/@supermariozelaya/video/7273265198046235909

Б. С. Б. | Црнобело