„Најдобриот шеф во светот“ им платил патување во Дизниленд во Токио на 1.200 вработени во знак на благодарност

Детали

среда, 01 ноември 2023

Таканаречениот „најдобар шеф“ во светот им платил патување во Дизниленд во Токио на 1.200 свои вработени, покривајќи ги трошоците за патот, сместувањето и билетите за забавниот парк. А, ова не е првпат да им приреди забавни изненадувања на вработените во знак на благодарност.

Тајкунот Кен Грифин кој е основач и извршен директор на компанијата Citadel LLC неретко е нарекуван „најдобриот шеф во светот“.

Милијардерот е познат по тоа што им приредува забавни изненадувања на неговите вработени, како приватен концерт со ѕвезди како Калвин Харис и бендот Coldplay.

Неговата компанија има канцеларии во САД, Азија и Европа, а вработените неретко добиваат луксузни подароци од него.

Неодамна, тој уште една покажа дека си ја заслужува титулата – на 1.200 вработени од канцелариите во Азија им подарил патување во Дизниленд во Токио.

Трошоците за ова патување веројатно не се ништо за 55-годишниот бизнисмен чие богатство се проценува на 33 милијарди долари.

Но, веројатно тој е еден од ретките ултрабогати шефови кои на овој начин си ги разгалуваат вработените.

Тој ги покрил трошоците и за партнерите и децата на вработените, а притоа платил екстра за да не мораат да чекаат во редици на забавниот парк.

Неретко, во забавните паркови на Дизни треба да чека и по еден час за најпопуларните атракции.

Во склоп на патувањето до Токио била организирана и забава.

Минатата година, милијардерот ги однел вработените во Дизниленд во Орландо.

Тој платил за вработени од Њујорк, Париз, Цирих и други европски градови, покривајќи ги трошоците за летовите до САД, хотелското сместување, оброците, како и билетите за Дизниленд.

Патувањето траело три дена, а една вечер им организирал и приватен концерт со Coldplay и диџејот Дипло.

Спирова С. | Црнобело