Европски градови најповолни за живеење со деца: Ниски кирии, мала стапка на криминал

Детали

среда, 29 ноември 2023

Просечната месечна кирија за трособен апартман во Виена e 1.560 евра, што го прави еден од попристапните градови за живеење, кога ќе се земе предвид тамошната просечна плата. Кои други градови важат за најдобри за живот со деца?

Со зголемувањето на трошоците за живот, сè поголем број семејства бараат да се преселат во поевтини места за живеење. Но, преселувањето во друга земја, особено со деца, со себе носи многу предизвици.

Извештај од компанија за животно осигурување, Reassured, ги споредува европските градови, со цел да се утврди најдобрата дестинација за едно семејство.

Студијата анализирала низа фактори, вклучувајќи ги и просечните месечни кирии во споредба со тамошната плата, достапните активности за деца и стапките на криминал.

Кои европски градови се најдоа на врвот на листата, а кои се на последно место?

Виена се покажала како најдобар град за преселување со семејството

Просечната месечна кирија за трособен апартман во Виена е 1.560 евра, што го прави еден од попристапните градови за престој, за околу 2.800 евра поевтин од Женева, кој е пак најскап.

Овој австриски град има одлични удобности потребни за едно семејство, вклучувајќи и 44 паркови и 148 места за детски активности. Виена исто така се покажала како безбедно место за живеење, со ниска стапка на криминал.

Заедно со Виена, австриските градови Салцбург и Инсбрук исто така се најдоа во првите десет, што значи дека Австрија е земја најповолна за живеење со семејство.

Главните градови се највозбудливи за децата

За семејствата кои секогаш бараат некоја забавна активност, главните градови можеби се најдобрата опција. Истражувањата покажале дека Рим, Лондон, Париз, Прага и Амстердам имале најмногу активности за деца.

Рим има дури 687 различни опции за избор, како и 148 паркови.

Швајцарските градови се најбезбедни за семејства

При изборот на место за преселување, од најголема важност е безбедноста. Утврдено е дека Салцбург во Австрија има најниска стапка на криминал, но во целина, Швајцарија е рангирана како најбезбедна земја, вклучувајќи ги градовите Цуг, Лугано, Луцерн, Берн и Цирих.

Иако швајцарските градови можеби се безбедни, седум од нив завршиле во последните десет на рангирањето, токму поради високите трошоци за живот.

Месечната кирија за трособен апартман чини 4.400 евра во Цирих и 4.330 евра во Цуг, додека пак грижата за децата и во двата града чини околу 2.900 евра на месечно ниво.

Манчестер е најнеповолното место за семејство во Обединетото Кралство

Манчестер е рангиран на деветтото место од сите европски градови и е најлош во Обединетото Кралство.

Во извештајот се наведува дека иако трошоците за живот не се многу високи, овој град има една од највисоките стапки на криминал и високо ниво на загаденост.

М. Ѓ | Црнобело