„Ќе има кој да ме чува кога ќе остарам“: 70-годишна жена од Уганда роди близнаци

Детали

четврток, 07 декември 2023

70-годишна жена од Уганда роди близнаци со што стана една од најстарите родилки во светот. „Божја волја било да станам мајка на оваа возраст“ – вели таа.

На 29-ти ноември годинава Сафина Намукваја (70) од Уганда на свет донела момче и девојче со царски рез во болница во Кампала.

„Мајката се чувствува добро, разговара. Се движи сама кога ќе ѝ кажеме да стане“ – соопштуваат од болницата.

Инаку, се верува дека таа е најстара мајка во Африка.

Според пишувањата во светските медиуми, Сафина останала бремена со помош на ин витро оплодување во болницата. Со оглед на нејзината возраст, биле користени јајце клетки од донор и семена течност од нејзиниот сопруг.

Бебињата биле родени во 31-ва недела од бременоста и двете биле со тежина поголема од 1,3 килограми. Тие во моментов се во инкубатори и се во стабилна состојба.

„Се чувствувам одлично. Некои може да речат дека на 70 години сум премногу стара, но Бог одлучи дека ќе добијам близнаци на оваа возраст. Никој не може против Божјата волја“ – вели таа во изјава за медиумите.

Таа нагласи дека партнерот ја напуштил кога дознал дека ќе роди близнаци и воопшто не се ни појавил да ги посети во болницата.

Инаку, Сафина, првото дете го добила на возраст од 67 години во 2020-та година кога родила девојче, а вели дека ѝ се смачило луѓето да ѝ се потсмеваат затоа што нема деца.

„Се грижев за децата на другите луѓе и гледав како растат и ме напуштаат. Се прашував кој ќе се грижи за мене кога ќе остарам“ – вели таа.

Б. С. Б. | Црнобело