Мајка ѝ не знаела дека ќе го намалува желудникот: Детали за смртта на Британката заради која авион принудно слета во Белград

Детали

вторник, 23 јануари 2024

Млада Британка почина во болница во Србија, по компликации од операција за намалување на желудникот што ја направила во Турција. Девојката летала кон дома, во Англија, кога состојбата ѝ се влошила, по што авионот принудно слетал во Белград. За британските медиуми, мајка ѝ открива дека дознала за операција дури кога ќерка ѝ тргнала на пат.

Вчера српските медиуми ја пренесоа веста за трагичната смрт на 20-годишна Британка која починала во болница во Белград, по операција за смалување на желудникот изведена во Турција.

Девојката патувала со авион од Турција до Англија, кога здравствената состојба ѝ се влошила. Поради ова, авионот принудно слетал на аеродромот во Белград и на девојката ѝ била укажана здравствена помош, но, за жал, не преживеала.

Сега, за британскиот медиум Independent се огласи и мајката на девојката.

Починатата Морган Рибеиро ја направила операцијата во Турција на 5-ти јануари. Според нејзиниот дечко, Џејми Брустер, Морган се одлучила да ја направи операцијата во Турција бидејќи во Англија ќе требало да чека со години.

Операцијата поминала добро и три дена подоцна, Морган и дечко ѝ се качиле во авион за да се вратат во Лондон.

Но, за време на летот, состојбата на Морган се влошила и авионот слетал во Србија, по што таа била однесена во болница.

Според Independent, докторите му кажале на дечко ѝ дека Морган има септички шок, како и дека ќе треба да ѝ се направи операција.

Имено, за време на процедурата во Турција, на Морган ѝ било исечено тенкото црево и ова довело до инфекција.

На 9-ти јануари, девојката доживеала инфаркт, по што лекарите во Србија ја ставиле во индуцирана кома. Но, четири дена подоцна, Морган починала.

Неколку дена по трагичната смрт, мајката на Морган, Ерин Гибсон, дала изјава за британскиот Independent, истакнувајќи дека ќерка ѝ со години се соочувала со малтретирање поради вишокот килограми.

Притоа, мајка ѝ воопшто не знаела дека таа планира да прави операција во Турција.

„Додека растеше беше многу малтретирана. Отсекогаш имала проблеми со тежината и отсекогаш била поголема девојка, а имаше многу тешкотии со ова.

Јас ѝ кажував дека е убава и однадвор и однатре, навистина беше прекрасна девојка“, вели мајка ѝ за британскиот медиум.

Морган имала онлајн консултација за операцијата во септември 2023-та и набрзо потоа ја закажала процедурата во Турција.

Но, сестра ѝ дознала за нејзината намера дури на 25-ти декември. Нејзината мајка, пак, дознала многу подоцна.

„Кога открив, веќе беше многу доцна, Морган веќе беше во авионот. Имав лошо чувство бидејќи сум слушала за негативни искуства. Не сакам ова да ѝ се случи на ниту една друга девојка“, додава мајка ѝ.

За британскиот медиум се огласи и дечкото на Морган, кој вели дека таа зборувала со лекарите за процедурата, но наводно не била свесна за ризикот од операцијата.

Тој открива дека операцијата траела околу два и пол часа, а откако Морган се разбудила, чувствувала неудобност. Сепак, лекарите ја увериле дека сè е во ред.

На патот кон дома, дечко ѝ Џејми вели дека таа имала треска и чувствувала болка.

„Стјуардесата ѝ даде мраз и вода, ѝ беше тешко да дише, па ја однесоа на предниот дел од авионот каде што имаше повеќе простор.

Пробаа да ѝ дадат маска со кислород. Знаев дека се случува нешто сериозно“, открива момчето.

Сега семејството на Морган пробува да собере пари за пренесување на нејзиното тело од Србија во Англија.

Според Independent, тие верувале дека трошоците за транспортот и погребот веројатно ќе бидат повисоки од 10.000 евра.

Спирова С. | Црнобело