„Сопругот ме запроси со прстенот што го купил за бившата свршеница“ – Жена ја споделува својата бизарна приказна

Детали

понеделник, 27 мај 2024

„Зошто ти кажал дека прстенот бил наменет за бившата? Да не сакал намерно да те повреди?“ – прашуваат следбениците на жена од САД, која раскажа како дознала дека прстенот со кој сопругот ја запросил, припаѓал на неговата поранешна свршеница, па дури и таа го дизајнирала.

Како би се чувствувале кога би дознале дека вашиот сопруг ве запросил со прстенот што првично бил наменет за друга жена?

Бела Блејк од Тенеси, САД, привлече огромно внимание на социјалните медиуми откако ја раскажа бизарната приказна за тоа како дознала дека сопругот ја запросил со прстенот што го купил за поранешната свршеница.

Нејзиното видео на ТикТок има милионски прегледи, а во него таа раскажува дека се чувствувала мошне повредено кога дознала дека свршеничкиот прстен што гордо го покажува, не бил наменет за неа.

„Си дојдов дома и зборував за тоа колку ми се допаѓа прстенот...

Навистина ми се допаѓа, прекрасен е... На што сопругот ми рече: ‘Да? И на Ерика ѝ се допаѓаше’“.

Жената раскажува како останала целосно збунета и вчудоневидена откако сопругот ѝ признал дека со истиот прстен ја запросил жената Ерика со којашто бил свршен една година.

Тој дури и ѝ објаснил дека прстенот не го избрал сам, туку со неговата поранешна свршеница заедно биле во златарница и им направиле прстен по нарачка.

„Ми се допаѓа, прекрасен е, но тоа не е мојот прстен и не е прстенот што јас би го избрала за себе“ – вели таа и додава дека нејзиниот поранешен сопруг одбил да ѝ го купи прстенот што таа го сакала затоа што бил скап, па го рециклирал прстенот со два дијаманти од бившата свршеница.

Нејзиното видео собра огромен број коментари и речиси сите се сложни дека тој немало потреба да признае дека прстенот припаѓал на друга жена.

Други, пак, велат дека треба да го продаде и со него да си плати адвокат за развод.

Б. С. Б. | Црнобело