Изолирано амазонско племе за првпат доби интернет: „Децата се залепени на екраните, зависни се од порно“

Детали

среда, 05 јуни 2024

Пред 9 месеци добија интернет, по стотици години изолираност, а веќе се соочуваат со последиците. Припадниците на конзервативно амазонско племе Марубо се среќни што имаат брз пристап на информации, но веќе забележуваат нагли промени кај својот подмладок.

Племето Марубо стотици години наназад живее во заеднички колиби распространети по течението на реката Итуи во Амазонската шума.

Имаат сопствен јазик, користат билки за да се поврзат со шумските духови и ловат мајмуни за храна или како миленици.

На овој начин живееле сѐ до септември минатата година, кога за првпат добија пристап до брз интернет, благодарение на Илон Маск.

Новинари на The New York Times отпатуваа длабоко во Амазонската шума за да направат репортажа и да увидат што се случува кога на малите, изолирани племиња ќе им се обезбеди пристап до западниот свет.

„Кога добивме интернет, сите бевме среќни. Интернетот ни донесе голем број придобивки. Можеме да разговараме со роднините што живеат далеку или да повикаме помош во итни ситуации, но работите се влошуваат“ – вели Тсанаима Марубо, припадничка на племето.

Таа вели дека најзабележителни промени има кај младите припадници на племето кои сѐ повеќе одбиваат да се вклучат во секојдневните активности на племето.

„Младите луѓе станаа мрзливи заради интерентот. Тие научија да се однесуваат како белите луѓе“ – вели таа.

По само 9 месеци користење интернет, и припадниците на ова изолирано племе се соочуваат со истите проблеми со кои што се соочуваат и луѓето во модерната цивилизација.

Децата се залепени за телефоните, озборувања во групните разговори, зависности од социјални мрежи, комуникација со непознати лица, насилни видео игри и секако порнографија...

Ова особено ги загрижува припадниците на конзервативното племе, каде дури и бакнежите во јавност се забранети.

Тие забележале дека младите почнуваат меѓусебно да споделуваат порнографски содржини, а стравуваат дека некои од припадниците ќе почнат да го прават тоа што го виделе на филмовите.

Племето веќе забележало агресивно сексуално однесување кај некои од припадниците.

Исто така, она што особено ги загрижува е тоа што разговорот меѓу припадниците на племето замира.

„Сите се постојано онлајн, па понекогаш и воопшто не разговараат меѓу себе“ – вели Алфредо Марубо.

Инаку, Илон Маск планира да ги поврзе на интернет сите изолирани племиња во Бразил, а какви промени ќе донесе тоа кај нив, останува допрва да се види.

Б. С. Б. | Црнобело