„Бев шпион и спиев со мажи за да изнудам информации од нив – среќна сум што побегнав од тој живот“

Детали

четврток, 27 јуни 2024

„Кога ги гледав другите жени шпиони на возраст од 50-тина години, беа мизерни и осамени. Не смееја да имаат живот или семејство. Не сакав и мене да ми се случи тоа, па побегнав“, открива Алиа Роза која во младоста била шпион во Русија.

Алиа Роза, која е родена во Казахстан, а голем дел од животот поминала во Русија, вели дека во минатото била руски шпион, а нејзиното главно оружје биле заведувањето и сексот.

Задачата на Алиа била да ги заведува луѓето кои ги гонела, кои најчесто биле криминалци вмешани во трговија со луѓе.

Неретко, Алиа морала да има и секс со криминалците со цел да добие информации од нив кои подоцна можат да се искористат во нивното апсење.

Од наша перспектива, овој период од животот на Алиа изгледа како филм за Џејмс Бонд, но таа вели дека почнала да се чувствува како и самата да е присилена да го продава своето тело.

Па, се откажала од професијата, успеала да побегне од Москва и си го променила името.

„Молчев две децении, но од неколку причини морав да ја споделам мојата приказна. Повеќе не можев да живеам со болката.

Најголемото достигнување во мојот живот е тоа што станав мајка. Отсекогаш сакав да имам деца, но тоа ми беше забрането.

И, тогаш си реков ’Чекај, имам само еден живот. Не сакам да го потрошам жртвувајќи се за нешто во коешто повеќе не верувам‘.

Во тој миг почнав да барам начин да избегам“, раскажува таа во интервју за Fox News Digital.

Алиа била родена во семејство воени ветерани – дедо ѝ се борел во Втората светска војна, додека татко ѝ бил офицер со висок чин во Советскиот сојуз.

И, татко ѝ бил тој која ја натерал и таа да се вклучи во слична работа, без разлика што како мала сонувала да стане модна дизајнерка.

„Уште од најрана возраст учев боречки вештини и вежбав. Ниту едно дете не може да влезе во програмата во којашто бев јас ако не е син или ќерка на офицер со висок чин.

Никогаш не ни помислив дека ќе станам дел од програма каде што ќе треба да учам како да користам секс“.

На 18-годишна возраст, Алиа била избрана од 350 други девојки и станала дел од тајна програма.

Како дел од програмата, Алиа почнала да учи како да го користи сексот како оружје.

„И, не стануваше збор само за секс. На некој начин, учевме како да комуницираме. Како да се облекуваме, како да се нашминкаме, како да се претставиме, како да зборуваме со нашите мети и да ги натераме да ни веруваат…

Главен фокус ни беше психологијата на луѓето, на криминалците, на мажите. Учевме да ја разбереме нивната перспектива и да откриеме што сакаат.

Учевме и техники за секс. Тоа беше ужасно. Но, главната цел беше нашите мети да станат опседнати со нас“.

Алиа истакнува дека ѝ требале неколку години за да сфати дека и самата била жртва на манипулација.

„Ме натераа да верувам дека сум херој кој се бори против трговија со луѓе. Дека ги спасувам децата кои биле киднапирани…

Ние, како агенти, имавме многу ниска плата – околу 100 долари месечно за 6-дневна работна недела. Но, се чувствував како патриот, како херој кој спасува животи.

Си го жртвував телото за сите овие мисии. Но, никогаш не се прашував како навистина се чувствувам што дозволувам телото да ми биде искористено од сите тие криминалци.

Еден поранешен агент ми рече и јас самата сум била жртва на присилна проституција…“

Во 2004 година, Алиа се вљубила во маж кој всушност бил нејзина мета. Откако мажот дознал дека е шпионка, ѝ помогнал да избега од Москва.

Таа се нема вратено во Русија повеќе од една деценија и го крие нејзиното вистинско име.

И, вели дека го направила вистинскиот избор.

„Додека работев во Русија, ги гледав сите други жени агенти кои кога ќе стигнеа одредена возраст, на пример 56 години, беа мизерни, осамени.

Не им беше дозволено да имаат свој живот. Не смееја да имаат семејство. Не можев да дозволам тоа да ми се случи и мене“.

Денес Алиа е мајка на едно дете и живее во Лос Анџелес. 

Прочитајте и: „Јас сум поранешен шпион – тренирана сум да ги заведувам метите, имав секс обука на академија“

Спирова С. | Црнобело