Француско село каде сите жители имаат Алцхајмерова болест - како им изгледа животот?

Детали

сабота, 13 јули 2024

Селото Ланде е експеримент за да се види дали отстранувањето на стресот кај личностите со Алцхајмерова болест, може да помогне за да се забави прогресијата на болеста.

Во југозападна Франција постои уникатно село каде што сите жители страдаат од деменција.

Во селото Ланде, за во продавницата не се потребни пари, така што никој не мора да се сети дека со себе треба да го понесе својот паричник.

Покрај продавницата и ресторанот, тамошните жители имаат можност да посетуваат театар и да учествуваат во забавни активности.

Идејата е на жителите да им се даде што е можно поголема слобода.

Селото Ланде е всушност експеримент, за да се види дали отстранувањето на стресот кај личностите со Алцхајмерова болест, може да помогне за да се забави нејзината прогресија.

Експериментот е предводен од тим истражувачи од Универзитетот во Бордо, на чело со професорката Хелен Амиева, која ги посетува жителите на секои шест месеци за да разговара со нив и да следи дали болеста напреднала.

Според професорката Амиева, семејствата чувствуваат помалку вина знаејќи дека нивните блиски живеат во тоа село и дека стручни лица се грижат одлично за нив. 

„Она што го порано го гледавме кога луѓето влегуваа во институциите, беше забрзан когнитивен пад, а овде тоа не е забележано.

Имаме неколку причини да веруваме дека ’институциите‘ од ваков вид може да влијаат на движењето на клиничките резултати“, вели таа.

Жителите плаќаат годишен надомест од 28.000 евра, во споредба со околу 20.000 евра за поконвенционален дом за стари лица.

Сепак, и регионалната француска влада одвоила средства за ова село, во кое живеат околу 120 жители, но и исто толку здравствени работници и волонтери.

М. Ѓ. | Црнобело