Драма во семејството на Ралф Шумахер: Бившата лаже дека не знаела дека е геј, синот јавно го поддржа

Детали

сабота, 24 август 2024

„Би сакала да знаев, да ме вклучеше во таа негова одлука. Тоа ќе беше знак дека и понатаму ме почитува. Кога објави дека е геј, како да ми заби нож в срце“, изјави поранешната сопруга на Ралф Шумахер - а тој за да докаже дека лаже, објави приватна преписка меѓу неа и неговиот дечко, Етјен.

Ралф Шумахер, помалиот брат на Михаел Шумахер, неодамна ја изненади јавноста кога призна дека е геј и во среќна врска со својот партнер Етјен.

„Најубавата работа е кога во животот имаш вистински партнер со кого можеш да поделиш сè“, напиша тој на Инстаграм и објави прва фотка со партнерот.

Веста, која дојде како шок за многумина, се чини ја погоди и неговата поранешна сопруга Кора, со која беше во брак 14 години, пред да се разведат во 2015-та.

Таа даде интервју за германски Der Spiegel, во кое проговори за бракот и разводот со Ралф, но и дека веста дека е геј ја затекнала неспремна.

Кора изјави дека, во најмала рака, очекувала поранешниот маж да ѝ каже, пред да објави јавно, пред целиот свет.

„Би сакала да знаев, тој да ме вклучеше во таа негова одлука. Тоа ќе ми беше знак дека и понатаму ме почитува.

Кога објави, како да ми заби нож в срце. Таквото признание влијае и на најблиските, вклучувајќи ја и поранешната сопруга со која имаш дете“, изјави таа.

Таа во интервјуто додаде и дека се чувствува искористено после скоро деценија и пол во брак.

„Како залудно да си ги потрошив најубавите години во животот.

Се прашувам дали некогаш воопшто бил искрен со мене и дали ме сакал? Му верував слепо, а неговиот збор за мене беше како заклетва“, додава таа.

Во текот на кариерата на Ралф, многупати се зборуваше дека е геј, но тој негираше, сè досега. На оваа тема разговарала со својот тогашен сопруг.

„Имаше гласини дека сака мажи и неколкупати го прашував дали е вистина, но секогаш ми велеше дека си замислувам работи и дека ми треба стручна помош“, вели Кора.

По нејзиното интервју, Ралф ја обвини дека лаже и дека таа знаела за неговата врска со Етјен.

За да докаже дека бившата жена се претставува како жртва, Шумахер на својот Инстаграм објави принтскрин од порака меѓу Кора и Етјен, од октомври 2023.

Во пораката таа му честита на Етјен за „венчавката со Ралф“ и им посакува среќа, иако Етјен ѝ вели дека прстените што ги носат не се бурми.

Единствениот кој од прв момент го поддржа јавно Ралф, е неговиот син Давид, а кој е исто како и неговиот татко, тркач.

„Среќен сум што конечно најде некој покрај кого се чувствуваш пријатно и заштитено, без разлика дали е маж или жена. Тато, во потполност стојам зад тебе, ти посакувам се најдобро и ти честитам“, напиша Давид.

А. Ј. | Црнобело