Русин спасен по 67 дена во чамец среде студено море, со мртвите тела на брат му и внукот: „Морав да преживеам“ (видео)

Детали

вторник, 22 октомври 2024

Маж од Русија преживеал 67 дена во чамец среде студеното Охотско Море, откако му се расипал моторот и му се скршиле веслата. На чамецот биле врзани мртвите тела на неговиот брат и неговиот внук, кои биле со него, но му подлегнале на студот.

На видео кое вирално почна да се шири на социјалните мрежи се гледа како неколку луѓе спасуваат маж од чамец среде студеното Охотско Море во Русија.

Мажот по име Михаил Пичугин поминал 67 дена во чамецот, откако моторот на чамецот се расипал.

46-годишниот Русин бил во друштво на неговиот брат и неговиот внук кои не го издржале студот.

Односно, голем дел од 67-те дена тој ги поминал во чамецот со нивните мртви тела.

Кликнете на Инстаграм објавата за да го изгледате видеото од спасувањето:

Михаил и неговите 49-годишен брат и 15-годишен внук отишле да гледаат китови во морето.

На 9-ти август, моторот на чамецот им се расипал, а им се скршиле и веслата.

Поради ова, и фактот дека биле многу оддалечени од брегот, немале како да се вратат назад.

Благодарение на нивните семејства, надлежните почнале потрага, но не успеале да ги лоцираат.

Студеното Охотско Море често е покриено со магла, а бидејќи температурата на водата е многу ниска, сите биле сигурни дека се загинати.

Но, 67 дена подоцна, на 15-ти октомври, чамецот бил забележан од рибарски брод, и тоа на околу 1.000 километри од местото од кое Михаил, брат му и внук му тргнале.

Михаил, иако ослабен, е во добра здравствена состојба и од болничкиот кревет го сподели своето искуство.

За руските медиуми, тој вели дека иако имале телефон, немале никаква мрежна покриеност за да се јават.

Сепак, успешно го користеле GPS уредот на телефонот, но по една недела, батеријата, заедно со резервната, им се истрошиле.

Со себе тие имале сигнални ракети, но не успеале да им го привлечат вниманието на спасувачите.

„Хеликоптер помина близу до нас, па уште еден по три дена. Но, не нè забележаа“, вели Михаил.

Дождливото време им било од корист бидејќи ја собирале водата за да ја пијат. Но, им било тешко да се стоплат.

„Имавме вреќа за спиење, но беше влажна и никако не можеше да се суши.

Па, се туткавме под неа, мрдавме малку и колку-толку ќе се стоплевме“.

Михаил вели дека со себе имале неколку пакетчиња нудли и грашок, а пробувале и да уловат риба.

15-годишниот внук на Михаил, односно синот на брат му, починал во септември од хипотермија.

По ова, брат му на Михаил како да полудувал – изгубил надеж дека ќе бидат спасени, а во една пригода сакал и да скокне од бродот. По некое време, починал и тој.

Михаил не сакал да ги остави нивните тела, па ги врзал за бродот за да ги врати на брегот, каде што ќе можат да бидат погребани.

По спасувањето, Михаил изјави дека преживеал бидејќи сигурно имал помош од Бог.

„Немав избор освен да преживеам. Дома ме чекаа мајка ми и ќерка ми“.

Михаил со ќерка му и поранешната сопруга

Михаил бил дехидриран и ослабен, но во стабилна состојба.

Надлежните, пак, за руските медиуми велат дека е чудо што чамецот не бил потонат од брановите, а уште поголемо чудо било што Михаил некако преживеал.

Штом Михаил ќе излезе од болница, можно е да се соочи со казна бидејќи неговиот чамец немал дозвола да се оддалечи повеќе од 4 километри од брегот.

Спирова С. | Црнобело