Бебе се роди во авион среде лет кон Брисел: „Со жена ми бевме на тој лет – секоја чест за тимот“

Детали

петок, 14 февруари 2025

„Беше посебен момент кога екипажот рече – имаме нов патник на летот“ - Кратко по полетувањето од Дакар кон Брисел, патничка во 32-ра недела принудно морала да се породи во авион, со помош на стјуардеса, медицинска сестра со минимално искуство и млад доктор кој се нашол на летот. Бебето доби уникатно име.

Од авиокомпанијата Flying Brussels денес споделија интересна вест – за време на нивниот лет од Дакар кон Брисел, бремена патничка принудно се породила.

„Кратко по полетувањето, нашата неверојатна Џенифер, член на екипажот, заедно со тазе дипломирана медицинска сестра и доктор кои беа на летот, помогнаа да се роди оваа мала радост.

Беше вистински пример за тимска работа, грижа и неверојатни моменти кои се случуваат во небото. Добре дојде на светот, мала Фанта.

Се надеваме дека еден ден ќе ни бидеш повторно патник“ – напишаа од авиокомпанијата на Инстаграм.

Под нивната објава на социјалните мрежи, коментирал патник кој бил присутен на летот и го споделил своето искуство:

„Јас и мојата сопруга бевме на тој лет. Честитки до екипажот и до прекрасната објава која гласеше – Имаме нов мал патник на летот. Посебен момент!“.

Трудницата од Сенегал била во 32-та недела од бременоста, а на почетокот на летот добила силни породилни болки, па екипажот ја однел во задниот дел за да може да има поприватни моменти.

За среќа, на летот имало медицинска сестра, 22-годишна девојка со многу малку искуство бидејќи добила лиценца 2 недели претходно, но решила да даде сè од себе и да помогне, а и се приклучил и млад доктор кој бил меѓу патниците.

Кога увиделе дека на жената ѝ пукнал воденикот, пилотот веднаш завртел да се врати во Дакар за да се породи во болница, но не успеала да дочека и бебето се родило во авионот.

„Беше стресно, но помина добро. Се двоумев дали да се впуштам во тоа бидејќи немам многу работно искуство, но решив да помогнам.

Кога ја тргнавма настрана си помислив – се надевам нема да се породи тука. Почнавме да ѝ ги мериме контракциите, а кога видовме дека пукнал и воденикот, не можеше да се чека повеќе.

За среќа помина добро. Жената беше одлична. Се породи на под на авион без никакви лекови за болка“ – изјавила младата медицинска сестра за BrusselsMorning.

М. М. | Црнобело