Која е жената поради која папата Франциск се замонашил - Ѝ рекол ако не се оженам со тебе, ќе станам свештеник

Детали

вторник, 22 април 2025

Младиот Хорхе Марио Берголио, тогаш 12-годишен, се вљубил во својата сосетка Амалија Дамонте. Тој ѝ напишал писмо со цртеж и порака: „Ако не те оженам, ќе станам свештеник“... Тоа момче Хорхе потоа стана папата Франциск - еден од најсаканите папи на сите времиња.

По смртта на папата Франциск, кој почина вчера (21.04), светските медиуми се присетуваат на помалку познатите детали од неговиот живот, вклучително и младешката љубов која, според некои, го насочила кон свештеничкиот пат.

Уште како 12-годишно момче, Хорхе Марио Берголио, како што тогаш се викал папата Франциск, се вљубил во својата сосетка Амалија Дамонте во Буенос Аирес.

Тоа била детска љубов, но доволно силна за да ѝ напише писмо во кое ја опишал нивната заедничка иднина како брачни партнери.

„Беше зрел, прекрасен дечко. Си игравме по тротоарите и во паркот, танцувавме танго…

Тоа беше искрено и невино пријателство, како од бајка.

И двајцата имавме големо срце за сиромашните, тука се препознавме како сродни души“, изјави Амалија за аргентинските медиуми.

Во писмото до неа, тој напишал: „Ако не се оженам со тебе, ќе станам свештеник.“

Покрај пораката, нацртал и срце прободено со стрела – симбол на младешката љубов.

Амалија била допрена од гестот, но нивната љубовна приказна немала среќен крај. Нејзините родители, кога дознале за писмото, ѝ забраниле каков било контакт со Хорхе.

Сметале дека не е соодветно нивната ќерка да биде во врска со момче што размислува за свештенички повик.

„Родителите строго ме спречија да го видам повторно. Никогаш повеќе не разговаравме,“ рекла Амалија, која денес има повеќе од 80 години и сè уште живее во истиот крај каде сè започнало.

Инаку, пред целосно да се посвети на верата, Хорхе Берголио живеел сосема поинаков живот.

Работел како обезбедување во ноќен клуб и како учител, а бил голем љубител на тангото - омилениот аргентински танц.

Иако, по случката со писмото никогаш повеќе не се сретнале, приказната за Амалија и папата Франциск останува како сеќавање на детството и судбината која можела да се одвива поинаку.

Наместо љубов кон една жена, Хорхе избрал љубов кон човештвото и стана еден од најсаканите папи во современата историја.

С. С. | Црнобело