Емотивен момент: Болница им организира матура со црвен тепих на пациентите кои имаат смртоносна болест

Детали

вторник, 03 јуни 2025

„Танцував со медицинската сестра што ме чуваше“ – болница во САД им го исполни сонот на пациентите кои се борат со рак и други болести и им организираа матурска вечер со црвен тепих, возење во лимузина, диџеј и други работи кои на момент им го направија животот посреќен, додека се борат со најтешката битка. 

Во месецот на матурските прослави, мај, во болницата St. Jude Teen Formal во Мемфис, се случи емотивен настан за пофалба.

Беше организирана матура, но главни гости и ѕвезди на вечерта, беа пациенти кои се лечат од рак и други животозагрозувачки болести.

Преку 50 тинејџери присуствувале на настанот, меѓу кои имало матуранти, но и нивни блиски кои биле поканети како гости.

Матурантите имале можност да бираат одела и фустани кои сакаат да ги облечат, а почувствувале и како е да се пристигне со лимузина, да се оди по црвен тепих, да танцуваат и да уживаат во она што навистина треба да уживаат на свои години, додека во меѓувреме ја водат најтешката битка во животот.

„Катастрофална болест не треба да ги спречи овие деца да ги доживеат истите искуства како другите деца на нивна возраст.

Сакаме нашите пациенти да добијат чувство на нормалност и да им помогнеме да создадат спомени кои ќе им траат цел живот.

Поентата е во тоа секој ден да им го направиме најдобар што може“ – изјавил претседателот и директорот на болницата St. Jude Children’s Research Hospital.

На фотографиите се забележува дека пациентите се пресреќни и на момент забораваат на проблемите со кои секојдневно се борат, а еден од нив изјавил:

„Омилен дел од вечерта ми беше танцувањето со медицинските сестри кои се грижеа за мене додека ме спремаа за трансплантација. Бев пресреќен што повторно ги сретнав и уживав со нив“.

М. М. | Црнобело