Последно селфи во авионот, пред трагедијата во Индија: Брачен пар се подготвувал за нов живот во Лондон со трите деца

Детали

петок, 13 јуни 2025

Меѓу загинатите во вчерашната авионска несреќа во Индија се сопружници кои биле доктори и нивните три деца. Сопругот работел во Лондон, а жената во Индија, но дала отказ и се подготвувале да го почнат новиот живот во англиската престолнина...

Во авионската несреќа во Индија што се случи вчера (12.06) загинаа 241 лице, односно двајцата пилоти и сите патници, освен еден.

Авионот полетал до аеродромот во Ахмедабад и требало да оди кон Лондон, но по само неколку минути, пилотите кажале дека губат моќ и авионот удрил во зграда во која имало медицински колеџ, како и државна болница.

Меѓу многуте жртви е и семејство со три мали деца. Пред полетувањето, тие направиле селфи фотографија во авионот која сега вирално се споделува на социјалните мрежи, како потсетник за тоа колку е непредвидлив животот.

Уште потрагично е што семејството одело кон Лондон каде што требало да го почнат својот нов живот.

На фотографијата се гледаат сопружниците Кони Вјас и Пратик Јоши и нивните три деца – осумгодишна ќерка и близнаци на возраст од пет години.

Кони Вјас работела како патолог во приватна болница во Индија, додека нејзиниот сопруг Пратик, кој исто така бил доктор, работел во Лондон како радиолог.

Според членовите на нивното семејство, Кони неодамна дала отказ, со цел да се вработи во Лондон за целото семејство да може да биде заедно.

Пратик работел во Лондон веќе четири години, додека Кони и децата живееле во Индија.

Па, сите со радост го чекале новото поглавје од животот, а блиските на семејството велат дека Кони цел месец се подготвувала за патувањето.

Пратик отишол во Индија пред 3-4 дена за да им помогне со подготовките, за потоа заедно да тргнат кон Лондон.

„Периодов Кони беше во Индија поради децата бидејќи уште ги чекаа нивните визи. Во средата (11.06) заминаа за Ахмедабад, за оттаму да го фатат летото до Лондон.

Пратик дојде во Индија пред неколку денови, за заедно да одат во Лондон“, открива братучетка на Кони за Indian Express.

На аеродромот ги придружувале членови од поширокото семејство, несвесни дека тоа е последниот пат што ќе ги видат.

Причината за несреќата уште се испитува, но експертите велат дека можна причина е нагло менување во јачината на ветерот или, пак, можеби во двата мотора удриле птици, истовремено.

Кратко по несреќата, спасувачките екипи открија дека извлекле 30-тина тела, по што се огласија и од полицијата со прогноза дека веројатно нема ниту еден преживеан во авионот.

Единствената преживеана личност е 40-годишен Британец кој бил во Индија на деловно патување.

Прочитајте и: Се огласи семејството на преживеаниот Британец во Индија: „Чудо е како останал жив, ни се јави од срушениот авион“

Спирова С. | Црнобело