Како престој во хотел: Зошто норвешките затвори се најхумани и најефикасни во светот?

Детали

понеделник, 16 јули 2018

Додека во другите затвори функционира принципот на закани, казни, притисоци и одмазда, властите во Норвешка се трудат криминалците да ги мотивираат да станат подобри луѓе.

Затворите во скандинавските земји се комплетно различни од затворите во останатиот дел од светот, особено од суровите затвори во Америка. Најефикасен затворски систем во цел свет има Норвешка.

Таму се наоѓа и затворот „Halden“ еден од најхуманите затвори на светот, кој личи на хотел, иако е затвор со максимална безбедност и во него престојуваат многу убијци, силувачи и разни криминалци.

Главното мото на норвешките затвори е дека тие им ја одземаат слободата на осудениците, а не животот и нивна цел не е одмазда на затворениците за стореното дело, туку рехабилитација и нивно успешно враќање во општеството.

Тие не веруваат во животински третман кон затворениците, туку во хуман пристап и пријателски однос на чуварите и затворениците.

Во норвешките затвори секој затвореник има своја соба со тоалет, телевизор, гардеробер, ДВД. Тие можат да се дообразуваат, сами да си приготвуваат храна, а во Halden затворот дури и да свират на инструменти, пејат и да снимаат песни.

Имаат пристап и до ножеви и разни алатки, кои во другите затвори веднаш се сметаат за потенцијално оружје за убиство и се строго забранети кај затворениците.

Многумина се скептични за овој пристап со толку убави услови за живот за затворениците, но најниската стапка на криминалци кои повторно се вратиле во затвор во Норвешка е доказ за неговата функционалност.

Додека во Америка пак, највисока стапка на враќање во затвор има токму кај криминалците кои лежеле во најозлогласените затвори.

Во Норвешка, исто така, не постои доживотна казна затвор, а државата се грижи за затворениците и по излегувањето од затвор. Од место за живеење до пронаоѓање на соодветна работа, тие не се препуштени сами на себе, туку имаат помош да се интегрираат како граѓани кои ќе ѝ бидат корисни на Норвешка.

Како изгледаат норвешките затвори:

https://www.youtube.com/watch?v=MAaR0TfNxPE

https://www.youtube.com/watch?v=TgujwijPwxo

С. С.| Црнобело