Какви традиции има во различни земји низ светот за првиот школски ден?

Детали

сабота, 18 август 2018

Полека се ближи почетокот на школската година, а учениците и родителите на помалите се подготвуваат за 1-ви септември.

За малечките кои ќе тргнат во 1-во одделение, има мала церемонија и прослава, за оние кои ќе почнат 1-ва година средно, следи запознавање со професорите и различниот начин на функционирање од претходно.

Но, во секоја земја на различен начин се одбележува почетокот на школската година, а во многу има посебни традиции кои се повторуваат секоја година.

Иако не сите земји почнуваат со училиште во септември (некои почнуваат и во август), сепак добро е да знаете колку многу различни традиции има за да им помогнат на учениците да се подготват за почетокот.

Во Германија, децата кои почнуваат со прво одделение, добиваат на подарок големи „корнети“ полни со училишни додатоци и слатки работи.

Училиштата во Индонезија го користат првиот школски ден за да ги запознаат учениците еден со друг, така што ги делат во групи и им доделуваат заеднички активности преку кои ќе се зближат за годината да им оди полесно.

Повеќето ученици и студенти во Јапонија, на првиот ден добиваат ранец како подарок за новата школска/академска година.

Не секоја земја има прослава за прв школски ден, помеѓу кои е и Кувајт, каде тоа е како и секој обичен ден, а се разликува само по подготовките во семејството и купувањето униформи и слично.

Во Русија првиот школски ден е познат и како „Ден на знаењето“, има собир со ученици и родители, децата некогаш им даваат цвеќиња на наставничките.

Исто така има и традиција на „прво ѕвонче“, кога помлада девојка е качена на рамената на постаро момче кој ја носи околу учениците додека таа ѕвони со ѕвонче за да го означи почетокот.

Почетокот на нова школска година некаде е многу скап, како што е случај во Бразил, со оглед на тоа што цената на уличишните прибори и додатоци расте значително пред почетокот на училиштето, дури и до 5 пати повеќе од вообичаената цена.

Во Саудиска Арабија прославите за почеток на школска година може да траат со денови, каде учениците се социјализираат и запознаваат пред да почнат да учат.

Во некои училишта во Виетнам учениците имаат приредба на која настапуваа пред родителите, пријателите, семејството и наставниците.

Во Македонија пак, во некои основни училишта има голема приредба за дечињата кои ќе започнат 1-во одделение, а оние повозрасните доаѓаат на првиот школски ден да разговараат со новиот или стар класен раководител, да се видат и раскажат како го поминале летото, кои ќе им бидат активностите во текот на годината и слично.

М. М. | Црнобело