Сите метеорски дождови до крајот на годинава што вреди да ги набљудувате

Детали

вторник, 30 јули 2019

Можеби веќе се подготвувате за Персеидите, но знаевте ли дека има други метеорски дождови што вреди да ги набљудувате? 

Во продолжение погледнете ги метеорските дождови што можеме да ги очекуваме до крајот на годината и кои, за среќа, се видливи и од кај нас.

Јужни Делта Аквариди

Во последната недела од јули има неколку метеорски дождови, а еден од нив се Jужните Делта Аквариди кои се највидливи на 30-ти јули. Овој метеорски дожд најдобро се набљудува од јужна половина на Европа и се забележуваат од 10 до 15 метеори на час.

Во најактивниот период, можат да се забележат и до 40 метеори на час. Делта Аквардитите се познати по нивните светли, и често разгорени метеори.

Персеиди

Ова е можеби најпознатиот метеорски дожд, но, за жал, годинава ќе биде „засенет“ од речиси полната месечина. Оваа година Персеидите ќе бидат најактивни на 13-ти август.

Добро е што дождот ќе трае и пред изгрејсонцето, така што ќе имате можност да ги набљудувате подобро. Кога небото е чисто и неосветлено, можат да се забележат и до 80 метеори на час.

Сепак, месечевата светлина ќе го ограничи овој број на околу 10-20 метеори на час.

Ориониди

Орионидите како да ја отвoраат „сезоната на метеорите“. Односно, после нив следуваат 3 месеци со чести метеорски дождови.

Највидливи ќе бидат на 22-ри октомври, а во тој период можете да забележите околу 20 метеори на час. Оваа година, исто како и за Персеидите, месечината ќе го осветли небото и ќе ја намали нивната видливост.

Тауриди

Тауридите се навистина интересен метеорски дожд кој е активен неколку месеци. Најчесто има два oграноци од дождот – Јужни Тауриди и Северни Тауриди. Јужните Тауриди се највидливи на 10-ти октомври и се забележуваат околу 5-7 метеори на час.

Северните Тауриди се најактивни на 12-ти ноември и ќе се забележуваат ист број на метеори. Иако Тауридите не се многу интензивни, познати се по светлите метеори.

Леониди

И Леонидите оваа година ќе бидат осветлени од речиси полната месечина, па се очекуваат околу 3-5 метеори на час. Највидливи ќе бидат на 18-ти ноември.

Геминиди

Геминидите се можеби најубавиот метеорски дожд во годината, но за набљудување повторно ќе пречи месечината. Сепак, и покрај тоа, ова е шоу што вреди да го видите.

Највидливи ќе бидат на 14-ти декември и се очекува да се забележат и до 30 метеори на час. Покрај тоа, ноќта за набљудување е петок, па ќе можете да ги гледате и до подоцна.

Урсиди

Последниот значителен метеорски дожд годинава се Урсидите. Највидливи се на 23-ти декември и обично се појавуваат околу 10 метеори на час.

Сепак, оваа година се очекува дождот да биде поинтензивен, а условите за набљудување ќе бидат совршени. Месечината ќе биде мала и ќе изгрее пред самрак, па нема да ви попречува во набљудувањето.

Спирова С. | Црнобело