Пријатели си изградиле свој град за да живеат заедно кога ќе се пензионираат

Детали

среда, 14 август 2019

Пријателите се луѓе кои доаѓаат и кои си одат од нашиот живот. Без разлика колку ви е драг некој пријател, животните околности можат да ви ги разделат патиштата и никогаш повеќе да не се видите. Но, овие пријатели решиле да не дозволат да им се случи тоа.

Овие четири пара се дружеле веќе 20 години, но секогаш им било тешко да останат заедно во ист град.

Бидејќи не се помирувале со тоа да бидат разделени, решиле да најдат некое решение и одлучиле да си направат мал град во кој ќе живеат заедно откако ќе се пензионираат.

Тие собрале пари и изградиле одржливи кабини покрај реката Лано во Остин, Тексас. Кабините се дизајнирани од архитектот Мет Гарсија и секоја од нив чини по околу 40.000 долари.

Пријателите го нарекле гратчето Llano Exit Strategy и планираат да се пензионираат таму.

Кабините се дизајнирани на тој начин што го извлекуваат максимумот од нивното опкружување. Нивните рефлексивни ѕидови и изолирани прозорци ги одржуваат кабините ладни дури и во лето.

До кабините се наоѓаат буриња за вода во кои собира и до 18.000 литри дождовна вода.

Секоја кабина има брачен кревет, тоалет и трем. Ентериерот е изработен од иверица, со што значително се намалила цената на куќичките.

„Овде е како во филм од Дизни. Имаме рисови, елени и секакви птици. Како што минуваме повеќе и повеќе време овде, наоѓаме повеќе животни“, изјавил еден од пријателите.

Дали и вие би направиле нешто вакво со вашата група пријатели или можеби би ги следеле стапките на 7-те пријателки кои си направиле куќа во која ќе остарат заедно?

Спирова С. | Црнобело