Втора година по ред - Животот во Виена официјално е најдобар

Детали

среда, 04 септември 2019

Веќе втора година по ред, Виена е прогласена за најдобриот град за живеење. Главниот град на Австрија ги доби речиси сите поени во истражување што опфаќа 140 градови од целиот свет. Во анкетата градовите биле оценувани според нивната стабилност, здравството, културата, околината, образованието и инфраструктурата.

На второто место се наоѓа Мелбурн, а ниту Лондон ниту Њујорк не успеале да се најдат помеѓу првите 40. Најлош за живеење е Дамаск, главниот град на Сирија, и тоа втора година по ред.

Веднаш после Мелбурн се наоѓа Осака во Јапонија, а петтото место му припаѓа на Калгари во Канада. На шестото место се наоѓа Ванкувер, а седмото место го делат Токио и Торонто.

Само уште еден европски град се наоѓа помеѓу првите 10 – Копенхаген во Данска го освои деветото место. На десетото место се наоѓа Аделаида во Австралија.

Во извештајот стои дека Лондон и Њујорк немаат добри оцени како другите градови бидејќи имале проблеми во категоријата стабилност, односно, во овие градови постои ризик од криминал и тероризам. Истовремено, и во двата градови инфраструктурата претставува слабост.

Изгледа дека Европа го има мнозинството од најдобрите градови за живеење – дури 8 од нив се помеѓу првите 20. А од 68 рангирани градови, 31 се европски. Најлошиот европски град за живеење е Атина.

Воглавно, градовите во западна Европа се наоѓаат погоре на листата, додека оние во јужна Европа освоиле помалку поени, најмногу поради факторите како криминал и слаба инфраструктура.

Градовите од поранешните советски држави освоиле повеќе поени во категоријата образование, но и овде проблемот е инфраструктурата. Како најлоши за живеење се покажале градовите во Африка, Азија и Јужна Америка.

За прв пат оваа година, во извештајот има и категорија влијание од климатските промени. Неколку градови, вклучувајќи ги и Њу Делхи и Каиро, изгубиле многу поени поради загадениот воздух, високите просечни температури и нееднаквата распределеност на водата.

Спирова С. | Црнобело