Дечко од Хонгконг бара девојка која ја запознал во Охрид - објавата се шири вирално

Детали

понеделник, 21 октомври 2019

Момче од Хонгконг објави фотка на Facebook со девојка која ја запознал во Охрид и бара некој да го спои со неа, бидејќи тој заборавил да ѝ побара контакт.

Хари е момче од Хонгконг кое бара помош од корисниците на Facebook, да пронајде девојка која ја запознал во Охрид и се фотографирал со неа, но не успеал да дознае ништо повеќе за неа, бидејќи брзал да ја стигне групата. 

Фотографијата ја објавил во група на Facebook, а во објавата која вирално се шири стои:

„Ве молам помогнете ми: барам девојка која ја запознав во Охрид.

Здраво на сите, јас сум од Хонгконг. Го посетив Охрид на 7-ми октомври. Црквите, езерото, времето – навистина е прекрасен град. Но, една случка ми остави посебна импресија од Охрид.

Околу 11.30 часот, се упатив кон местото за ручек со целата група и членови од турата. Одеднаш, една девојка побара да се фотографирам со неа. Бев малку шокиран, но прифатив и ова е фотографијата. Бидејќи бев веќе оддалечен од групата, само се поздравив со неа, се заблагодарив и си отидов, без да побарам контакт.

Ако ја познавате девојката од фотографијата, може ли да ме поврзете со неа? Ако не ја знаете, а ова ви е интересно, ве молам помогнете ми да се прошири објавата.

Ви благодарам. Ако се случи чудо, ќе ве известам!“

М. М. | Црнобело